Rasija pastavić u Biełaruś 12 vajenna-transpartnych Mi-8MTV-5
Padčas Mižnarodnaha vajenna-techničnaha forumu «Armija-2015» u padmaskoŭnaj Kubincy 16 červienia chołdynh «Viertaloty Rasii» Dziaržkarparacyi «Rostech» abviaściŭ pra padpisańnie kantrakta ź Ministerstvam abarony Biełarusi na pastaŭku ŭ 2016—2017 hadach dvanaccaci vajenna-transpartnych viertalotaŭ Mi-8MTV-5 rasijskaj vytvorčaści.
Pra heta paviedamlajecca na sajcie chołdynhu.
«Respublika Biełaruś źjaŭlajecca važnym partnioram Rasii ŭ halinie vajenna-techničnaha supracoŭnictva, — adznačyŭ hienieralny dyrektar chołdynhu «Viertaloty Rasii» Alaksandr Michiejeŭ. — Viertaloty Mi-8MTV-5 dapamohuć Sajuznaj dziaržavie pavysić abaranazdolnaść i pašyryć patencyjał uzbrojenych sił. Padpisańnie takoha maštabnaha kantrakta stała jašče adnym krokam u spravie ŭmacavańnia družby i dziełavych adnosin pamiž dźviuma krainami».
Kantrakt budzie vykanany ŭ adpaviednaści z dahavoram pamiž dźviuma krainami ab raźvićci vajenna-techničnaha supracoŭnictva ad 10 śniežnia 2009 hoda, a mienavita: pastaŭka viertalotaŭ budzie ažyćciaŭlacca na tych ža ŭmovach i z takimi ž charaktarystykami, jak i dla nacyjanalnych uzbrojenych sił.
Vajenna-transpartnyja viertaloty Mi-8MTV-5 vypuskajucca na Kazanskim viertalotnym zavodzie, jaki ŭvachodzić u chołdynh. Jany pryznačanyja dla vyrašeńnia šyrokaha śpiektra zadač — jak bajavych, tak i transpartnych. Viertaloty asnaščanyja sučasnym kompleksam piłatažna-navihacyjnaha, radyjosuviaznoha i metavaha abstalavańnia.
Za šmathadovuju ekspłuatacyju viertaloty typu Mi-8/17 dakazali zdolnaść paśpiachova spraŭlacca z pastaŭlenymi zadačami ŭ lubych klimatyčnych umovach i pa pravie ličacca adnymi z najlepšych u svaim kłasie.