Kabiakoŭ: Dolu prodažaŭ biełaruskich tavaraŭ u roźničnym handli treba adnavić
Premjer-ministr Biełarusi Andrej Kabiakoŭ zaniepakojeny źnižeńniem doli prodažaŭ tavaraŭ ajčynnaj vytvorčaści ŭ roźničnym handli, jakoje adbyłosia za apošnija niekalki hadoŭ. U aŭtorak na pasiadžeńni Prezidyuma Savieta Ministraŭ kiraŭnik urada pastaviŭ zadaču pa jaje adnaŭleńni.
Na siońniašnim pasiadžeńni byli razhledžany miery, što prymajucca ŭ respublicy, pa realizacyi halinovych i rehijanalnych prahram dziejańniaŭ pa impartazamiaščeńni, a taksama pa napaŭnieńni ŭnutranaha rynku tavarami biełaruskaj vytvorčaści.
Andrej Kabiakoŭ nahadaŭ, što rabota pa impartazamiaščeńni ŭ respublicy budujecca pa adobranaj kiraŭnikom dziaržavy ŭ kastryčniku 2008 hoda schiemie rabot, mierapryjemstvy jakoj achoplivajuć bolš za pałavinu nieenierhietyčnaha impartu. Taksama pa hetaj schiemie realizujucca inviestycyjnyja prajekty pa madernizacyi pramysłovaha kompleksu. Jak było adznačana, z 2008 hoda ŭ Biełarusi asvojena vytvorčaść praktyčna ŭsioj asnoŭnaj techniki i abstalavańnia dla sielskaj haspadarki, zakryta taksama šyrokaja namienkłatura budaŭničych tavaraŭ, za košt čaho tolki ŭ hetym hodzie skaraciŭsia impart paliravanaha škła na 53 pracenty, hipsakardonu - na 45 pracentaŭ.
«Za minułyja hady vyniki ŭ rabocie jość, ale jany nie źjaŭlajucca dla nas dastatkovymi, - kanstatavaŭ premjer-ministr. - Impart tavaraŭ zastajecca davoli vysokim». Tak, tolki za apošnija čatyry hady na 72 pracenty pavialičyŭsia impart spažyvieckich tavaraŭ (mebli - u 2,2 raza, myła - u 3,9 raza, lehkavych aŭtamabilaŭ - na 34 pracenty, lekavych srodkaŭ - na 44 pracenty).
«Surjoznuju zaniepakojenaść vyklikaje źnižeńnie doli prodažaŭ tavaraŭ ajčynnaj vytvorčaści ŭ roźničnym handli (z 77 pracentaŭ u 2010 hodzie da 70 pracentaŭ u I kvartale 2015-ha). Asabliva pa hrupie niecharčovych tavaraŭ (z 65,4 pracenta da 50,9 pracenta adpaviedna)», - pradoŭžyŭ kiraŭnik urada.
Tak, u pryvatnaści, z 2010 hoda ŭ struktury prodažaŭ na ŭnutranym rynku skaraciłasia dola ajčynnych televizaraŭ (z 76 pracentaŭ da 12 pracentaŭ), chaładzilnikaŭ i marazilnikaŭ (z 76 pracentaŭ da 65 pracentaŭ), pralnych mašyn (z 42 pracentaŭ da 34 pracentaŭ) i inš. U biahučym hodzie stračvajuć pazicyi na biełaruskim rynku ajčynnyja kandytarskija vyraby z cukru (na 2,4 pracenta), minieralnaja vada (na 6,3 pracenta), biezałkaholnyja napitki (na 2,6 pracenta). «Usie hetyja pazicyi na ajčynnym rynku pavinny być adnoŭleny», - padkreśliŭ Andrej Kabiakoŭ. Heta pytańnie jon daručyŭ uziać na samy žorstki kantrol vice-premjeru Uładzimiru Siamašku, mienavita jon usie hady kuryravaŭ realizacyju schiemy rabot pa impartazamiaščeńni ŭ krainie.
Kiraŭnik urada ličyć, što Ministerstvu handlu treba bolš aktyŭna pracavać z bujnymi sietkami i vytvorcami, a taksama z handlem u cełym. «Treba vybudavać dakładnuju sistemu, jakaja funkcyjanuje pry minimalnym administracyjnym umiašańni, - vykazaŭ mierkavańnie premjer. - Meta - u handli pavinna być bolš raznastajnych jakasnych i dastupnych pa canie ajčynnych tavaraŭ. Usio, što vyrablajecca ŭ krainie, pavinna być pradstaŭlena da vybaru pakupnika, i niachaj jon sam vyrašaje».
Andrej Kabiakoŭ padkreśliŭ: samy efiektyŭny instrumient u baraćbie za rynak siońnia - heta vysokaja jakaść ajčynnaj pradukcyi, šyroki asartymient, kankurentnaja cana, a taksama pazicyjanavańnie tavaraŭ na rynku i ich rekłama. Na jaho pohlad, biełaruskija pradpryjemstvy pakul marudna padstojvajucca pad rynak, słaba reahujuć na pytańni handlu. «Słaba vykarystoŭvajecca i patencyjał indyvidualnych pradprymalnikaŭ, a heta faktyčna mabilnaja, dobra padrychtavanaja, dastupnaja dla ludziej zbytavaja sietka», - padahulniŭ kiraŭnik urada.