Va Ukrainie na 4 hady asudžany biełarus z «Pravaha siektara» 28-hadovy Dźmitryj Liskovič
22 červienia Abałonski rajonny sud Kijeva vynies prysud pa spravie piaci siabroŭ arhanizacyi «Pravy siektar». Siarod padsudnych byŭ i biełarus Dźmitryj Liskovič.
Dźmitryj Liskovič (krajni sprava).
Aficyjna chłopcy byli asudžanyja za vykradańnie i źbićcio čałavieka. Ale abarona nastojvała na zusim inšaj viersii zdareńnia. Maŭlaŭ, u mai minułaha hoda ŭ «Pravy siektar» pryjšła adna žančyna, jakaja prasiła abaranić svajo žyllo ad rejderskaha zachopu. I pradstaŭniki «Pravaha siektara» adhuknulisia na hetuju prośbu.
Praŭda, potym čałaviek, ad jakoha nibyta abaraniali žyllo, padaŭ u sud na chłopcaŭ. Prakuror prasiŭ dla abvinavačanych 7 hadoŭ źniavoleńnia, jon nie bačyŭ nivodnaj źmiakčalnaj abstaviny spravy, ale prysud byŭ nie takim žorstkim — 4 hady.
Siarod asudžanych nie tolki biełarus Liskovič, ale i hramadzianin Rasii, jaki paŭtara hoda tamu pryjechaŭ va Ukrainu dziela padtrymki Majdana. Taksama asudžanyja try hramadzianiny Ukrainy — Alaksandr Połuharbataŭ, Andrej Dziemčanka i Andrej Pipienka.
Viadoma, što Liskovič niejki čas znachodziŭsia ŭ Łukjanaŭskim SIZA Kijeva, ale paśla byŭ pieraviedzieny na chatni aryšt.
Darečy, jak paviedamlajuć siabry asudžanych, žančyna, jakuju «pravasiektaraŭcy» abaraniali ad «rejdera», prychodziła na sud i płakała paśla abviaščeńnia vyraku. Kvateru adstajać u jaje atrymałasia. Sam paciarpieły na pracesie nie źjaŭlaŭsia, jon ciapier žyvie za miažoj.
Padčas usiaho źniavoleńnia pradstaŭniki «Pravaha siektara» dapamahali aryštavanym ź pieradačami i advakatam. U Abałonskim sudzie Kijeva «NN» nie pradstavili aficyjnuju infarmacyju pa pracesie.
Ciapier my sprabujem znajści dadatkovuju infarmacyju ab tym, kim byŭ Dźmitryj Liskovič, jak daŭno jon žyvie va Ukrainie i jak trapiŭ u «Pravy siektar».