Amierykancy stvorać žyvyja arhanizmy dla zasvajeńnia Marsa
DARPA sabrałasia nasycić i nahreć atmaśfieru płaniety paśla treniroŭki na Ziamli.
Mahčymyja vyniki teraforminhu Marsa. Vyjava: Daein Ballard, Wikimedia Commons
Amierykanskaje ahienctva pa pierśpiektyŭnych abarončych navukova-daśledčych raspracoŭkach (DARPA) stvoryć hienietyčna-madyfikavanyja arhanizmy dziela terafarmavańnia Marsa, paviedamlaje Motherboard.
Raśliny, bakteryi i vodaraści, zdolnyja da fotasintezu, tearetyčna zmohuć zrabić atmaśfieru Marsa prydatnaj dla čałavieka. Na praktycy spačatku pryjdziecca patreniravacca na Ziamli.
DARPA źbirajecca adabrać «najlepšyja» hieny žyvych arhanizmaŭ Ziamli z dapamohaj prahramy DTA GView. Prahrama źbiraje ŭsie viadomyja hieny i miescy ich raźmiaščeńnia ŭ hienomie. Abranyja hieny možna dadać u spačatku bakteryi, zatym mikraarhanizmy, a potym i ŭ bolšyja mnahakletačnyja arhanizmy.
«Upieršyniu ŭ historyi ŭ nas jość technałahičny instrumientaryj nie tolki dla pieraŭtvareńnia niehaścinnych miescaŭ tut, na Ziamli, ale i dla palotu ŭ kosmas nie tolki «kab naviedać», ale i «kab zastacca», — kaža pra stvareńnie takich arhanizmaŭ Alisa Džeksan, namieśnik kiraŭnika adździełu bijatechnałohij DARPA.
Atrymanyja arhanizmy źbirajucca vyprabavać spačatku na Ziamli — u rajonach, paciarpiełych ad katastrof. Kali madyfikavanyja arhanizmy akažucca zdolnymi adnavić razburanyja łandšafty i ekasistemy, nastupnym krokam stanie teraforminh Marsa.
Nazvać navat prykładnyja terminy teraforminhu cełaj płaniety pakul niemahčyma — chutčej za ŭsio, na heta syduć nie dziasiatki i nie sotni hod, a značna bolšyja adrezki času. Tym nie mieniej, stvareńnie arhanizmaŭ, zdolnych nie tolki vyžyć na Marsie, ale i zaŭvažna paŭpłyvać na jaho atmaśfieru, robić zadaču pieratvareńnia Marsa ŭ płanietu, prydatnuju dla čałavieka biez skafandra, tearetyčna vykanalnaj.