Fiziki: Suśviet skončycca Vialikim razryvam
U nas zastałosia 22 młrd hod.
Vyjava: Univiersitet Vanderbilta
Navukoŭcy univiersiteta Vanderbilta (ZŠA) pradstavili ŭ časopisie Physical Review D novyja dovady teoryi ab kancy viadomaha nam Suśvietu praz 22 młrd hod ad tak zvanaha Vialikaha razryvu.
Siońnia miarkujecca, što Suśviet pačaŭsia ź vialikaha vybuchu — ź biaskonca maleńkaha punktu razrośsia da siońniašnich pamieraŭ. Pavodle teoryi Vialikaha razryvu, śviet skončycca niečym advarotnym — materyja raźlacicca nastolki, što viadomyja nam zakony fiziki pierastanuć dziejničać.
U peŭny momant razburacca hałaktyki, zatym zornyja sistemy, potym płaniety, u kancy raspaducca i atamy.
Kab daviedacca, ci praŭdzivaja teoryja Vialikaha razryvu, treba viedać značeńnie paramietru w, što vyznačaje adnosiny cisku ciomnaj enierhii da jaje ščylnaści. Na siońnia hety paramietr nie vyznačany, što daje šaniec i inšym teoryjam.
U svaim daśledavańni amierykancy śćviardžajuć, što razabralisia z prablemaj sučasnaha apisańnia kancu Suśvietu.
Kali razhladać Suśviet jak relatyvisckuju vadkaść (takuju, što ruchajecca z chutkaściami, blizkimi da chutkaści śviatła), možna raźličyć jaje los da peŭnaha momantu, ale pad kaniec pryjści da zvyšśvietłavych chutkaściej, zabaronienych zakonami sučasnaj fiziki. Amierykancy ža razhladajuć Suśviet jak prastoru, zapoŭnienuju ściskalnaj vadkaściu — taki padychod daje značnuju rolu paramietru abjomnaj viazkaści, što nie ŭličvajecca ŭ bolšaści sučasnych teoryj.
Zhodna sa starymi teoryjami, paramietr w maje być mienšym za -1, kab Suśviet skončyŭsia Vialikim razryvam. Novaja teoryja kaža, što Suśviet naturalnym čynam dasiahnie takoha značeńnia ŭ budučyni. Śćviardžajecca, što takuju madel možna praličyć na kampjutarach, a zatym paraŭnać z naźbiranymi źviestkami.