Sud u Kazani aštrafavaŭ praciŭnikaŭ vulicy Nazarbajeva
Vachitaŭski rajonny sud Kazani aštrafavaŭ na 10 tysiač rubloŭ (177 dalaraŭ) aktyvistaŭ, jakija patrabujuć admieny rašeńnia ab pierajmienavańni adnoj z vulic horada ŭ honar prezidenta Kazachstana Nursułtana Nazarbajeva.
Jak vyrašyŭ sud, Leanid Abojšaŭ i Volha Juchnoŭskaja ŭdzielničali ŭ niesankcyjanavanym publičnym mierapryjemstvie 3 lipienia. U toj dzień čaćviora aktyvistaŭ byli zatrymanyja kala Doma družby narodaŭ, dzie prachodziła ŭračystaje mierapryjemstva, pryśviečanaje pierajmienavańniu vulicy.
Udzielniki akcyi, jakuju arhanizatary nazvali «lekcyjaj-prahułkaj», trymali ŭ rukach arkušy farmatu A4 z raniejšaj nazvaj vulicy — Eśpieranta. Spravy jašče dvaich zatrymanych — Ałsu Šakiravaj i Artura Hafarava — sud u paniadziełak razhledzieć nie paśpieŭ.
Vulica Eśpieranta była pierajmienavanaja ŭ vulicu Nazarbajeva pastanovaj harvykankama Kazani ad 26 červienia. Inicyjatyva naležała kiraŭniku nacyjanalna-kulturnaj aŭtanomii kazachaŭ Tatarstana Sahitu Džaksybajevu: na jaho dumku, hety žest dapamoža pašyryć suviazi Tatarstana z Kazachstanam.
U ciapierašni čas pad pietycyjaj suprać pierajmienavańnia vulicy na sajcie Change.org sabrana kala 3700 podpisaŭ. Na partale dziaržpasłuh Tatarstana skarhu padtrymali bolš za 1300 čałaviek.
U padtrymku pierajmienavańnia vykazalisia pradstaŭniki ŭładaŭ respubliki i deputaty niekalkich partyj. Pry hetym mer Kazani Ilsur Miatšyn paprasiŭ prabačeńnia pierad žycharami vulicy i pryznaŭ, što treba było pravieści bolš šyrokaje hramadskaje abmierkavańnie.
Vulica Eśpieranta nasiła hetuju nazvu ŭ pieryjad z 1927 pa 1947 i z 1988 hoda pa 2015. U pieryjad z 1947 pa 1988 vulica nasiła imia Andreja Ždanava.