Na Havajach zabaranili polietylenavyja pakiety
Chto znaje — mo praź niekalki hod zabaroniać i pa ŭsich Złučanych Štatach.
Fota: loudcanary.com
Vostraŭ Aachu apošnim z havajskich astravoŭ zabaraniŭ płastykavyja pakiety. Takim čynam Havai stali pieršym štatam ZŠA, u jakim pad poŭnuju zabaronu trapili pakiety, zroblenyja ź nieekałahičnych materyjałaŭ, paviedamlaje Mashable. Zabarona nabudzie siłu ŭ nastupnuju sieradu.
Na Havajach pradaŭcy nie zmohuć davać pakupnikam polietylenavyja pakiety — tolki adnarazovyja pakiety z ekałahičnych materyjałaŭ (takija, što chutka raskładucca ŭ hlebie) albo šmatrazovyja torby.
Parušalniki atrymajuć štraf u pamiery 100-1000 dalaraŭ za dzień pracy z parušeńniami.
Zakon na Aachu maje šerah vyklučeńniaŭ: u płastykavyja pakiety dazvolena pakavać sadavinu i harodninu, arechi, miasa, frukty, kvietki i niekatoryja inšyja tavary, restaracyi zmohuć pakavać u polietylen ježu navynas.
Padobnuju zabaronu razhladaje štat Kalifornija — płastykavyja pakiety ŭžo zabaronienyja ŭ San-Francyska. Jak pakazała praktyka z pryznańniem adnapołych šlubaŭ, «parad zakonaŭ» štataŭ moža pryvieści da pryniaćcia zakonaŭ na fiederalnym uzroŭni.
Płastykavyja pakiety ŭžo zabaronienyja ŭ roznych formach u niekatorych krainach śvietu: Kitai, Indyi, Italii, Paŭdniovaj Afrycy… Inšyja krainy ŭvodziać padatki na ich. Jeŭrasajuz pryniaŭ u 2014 hodzie dyrektyvu pa źmianšeńni vykarystańnia płastykavych pakietaŭ na 80% da 2019 hoda.
Zvyčajnyja polietylenavyja pakiety zaŭvažna zabrudžvajuć navakolnaje asiarodździe, u pryrodzie jany raskładajucca niedapuščalna doŭha. Pakiety nie tolki padvyšajuć zaśmiečanaść i zabivajuć vadaścioki — ad ich hinie mnostva žyvioł. Naprykład, ad pajadańnia pakietaŭ u Indyi hinie 20 karoŭ štodzień, u suśvietnym akijanie — 100 tysiač kitoŭ, ciuleniaŭ i čarapach štohod. Nafty, patrebnaj na adzin pakiet, zvyčajnamu aŭtamabilu chopić na 11 mietraŭ darohi.