Naviednicy minskaha restarana pryhrazili sudom za abraźlivy dopis u fejsbuku
Falcone niaŭdała pažartavaŭ pra naviednic jak dokaz taho, što jon nie «samy darahi restaran».
U aficyjnaj supołcy minskaha restarana Falcone 13 lipienia źjaviłasia fota dźviuch naviednic stałaha vieku z podpisam «Samy darahi restaran? Dy ładna, voś vam advarotny dokaz!». Paźniej jano było vydalenaje. Historyja niaŭdałaha žartu atrymała rozhałas u biełaruskich ŚMI.
Žančyny na fota nie vyhladajuć biednymi ci nieprystojna apranutymi — jany prosta nie maładyja dziaŭčaty. Jak vyjaviłasia paźniej, jany na samoj spravie daloka nie biednyja: abiedźvie źjaŭlajucca dyrektarami turfirmaŭ. I źbirajucca iści ŭ sud.
Vypadak padrabiazna apisaŭ Kyky.org. U kamientarach da fota karystalniki adznačali nieetyčnaść takoha žartu z uzrostu ci sacyjalnaha statusu naviednikaŭ, niepavahu da naviednikaŭ. Śpiecyjalisty pa markietynhu ŭ sacsietkach kazali, što takija vypadki mohuć być prykładam taho, jak nie treba pracavać — i pryvodziać da zvalnieńnia adkaznaha supracoŭnika. Restaran śćviardžaje, što aŭtar pasta byŭ zvolnieny adrazu paśla taho, jak pra vypadak pačuŭ dyrektar.
Adna z žančyn na fota raspaviała «Kamsamolskaj praŭdzie ŭ Biełarusi», što ich fatahrafavali bieź ich zhody: za susiednim stolikam chłopiec i dziaŭčyna niby zdymali butelku vina. Praź niekalki dzion supracoŭniki pakazali joj fota. Jana damahłasia asabistaj sustrečy z dyrektaram, jaki, pavodle jaje słoŭ, pierakłaŭ adkaznaść na presu i prapanavaŭ kampiensavać škodu abiedami za košt ustanovy. «Zaraz dyrektar sprabuje paprasić prabačeńnia. Ale ja nie chaču nijakich vybačeńniaŭ, — kaža jana. — Mianie abrazili i zhańbili na ŭsiu krainu. My z majoj siabroŭkaj źbirajemsia iści ŭ sud».
Dyrektar restarana vykazaŭ svajo mierkavańnie na Onliner.by. Jon ličyć, što restaran «pradstavili ŭ vobrazie abyjakavych i biespryncypovych kapitalistaŭ», pieratvaryli post u «respublikanski fienomien». Jon padkreślivaje, što restaran vydaliŭ «sprečny post» zadoŭha da vychadu pieršych artykułaŭ. «Nas paprakali, maŭlaŭ, navošta raźmiaścili fota. Raźmiaścili tamu, što byli rady, što da nas prychodziać samyja roznyja hości! — piša jon. — I darečy, paśla ŭsioj infarmacyjnaj šumichi, kali fota nabyła zusim inšy sens, ni adno vydańnie nie admoviłasia jaho publikavać i tyražavać. Nichto nie ŭzhadaŭ pra etyku, paproki i parady, što davali nam ža. Praviła «nie naškodzić» nie spracavała, kali namalavaŭsia «pryhožaja» skandalnaja infarmacyjnaja nahoda».
Tym časam sud z nahody pasta, kali adbudziecca, moža stać pieršym u Biełarusi, u jakim staronka ŭstanovy ŭ sacsietcy vystupić u roli internet-ŚMI ŭ adpaviednaści z novym zakonam.