Aściarožna, Windows abnaŭlajecca: niebiaśpiečny momant apdejta da «dziasiatki»
Microsoft choča zrabić vam pryjemna, ale kali ŭ vas padklučany limitavany internet, moža vyjści naadvarot.
Rabočy stoł Windows 10. Skrynšot: stuff.tv
Finalnaja viersija Windows 10 maje vyjści 29 lipienia. Jana budzie kaštavać 110-150 dalaraŭ, ale karystalniki licenzijnych «siamiorki» i «vaśmiorki» atrymajuć jaho biaspłatna. Adna prablema: Microsoft za dzień da relizu pačynaje tajemna zapampoŭvać fajły instalacyi, kali karystalnik zareziervavaŭ dla siabie abnaŭleńnie. Sama instalacyja maje prajści ŭ dzień relizu, 29 lipienia.
Niebiaśpieka ŭ tym, što abnaŭleńnie zapampoŭvajecca samastojna, niezaŭvažna dla karystalnika. Kali kampjutar padłučany da limitavanaha — naprykład, mabilnaha — internetu, karystalnik moža stracić kala 3 Hb trafiku.
Varta być aściarožnym, kali vy karystajeciesia limitavanym internetam i zamaŭlali sabie «aŭtadastaŭku» abnaŭleńnia. Darečy, nadalej nie atrymajecca adklučyć aŭtamatyčnyja abnaŭleńni — «dziasiatka» budzie ciahnuć usie «łatki» ŭ prymusovym paradku.
Uvahu na heta źviarnuli karystalniki reddit dy inšych forumaŭ i błohaŭ. Fajły abnaŭleńnia pačali źjaŭlacca ŭ schavanaj dyrektoryi $Windows.~BT na sistemnym dysku. Kali takoj dyrektoryi niama, a vy chočacie pachutčej atrymać abnaŭleńnie, zapuścicie słužbu Windows Update uručnuju.
Abnaŭleńnie moža nieści niazručnaści: prablemy z drajvierami, «vylety» prahramy abnaŭleńnia, raptoŭnyja «tarmazy»… Budźcie hatovyja da taho, što novaja Windows 10 u pieršyja dni moža być «syroj». Zatoje jaje abiacajuć biaspłatna abnaŭlać jašče dziesiać hod — «dziasiatka» moža stać naohuł «apošniaj Windows».
Siarod hałoŭnych navinak Windows 10 u nastolnaj viersii intehracyja hałasavoha pamočnika Cortana, viartańnie zvykłaha mieniu «Pusk», a taksama pierapracavany standartny braŭzier — užo nie Internet Explorer, a Microsoft Edge. Akramia nastolnaj, na vosień zapłanavany vypusk i mabilnaj Windows 10 (ahułam «dziasiatak» budzie siem).
Aŭtamatyčnyja abnaŭleńni da Windows 10 tyčacca tolki ŭładalnikaŭ licienzijnych viersij Windows 7 dy Windows 8. Karystalnikam XP pryjdziecca abnaŭlacca ŭručnuju. Piratam ža, abiacaje Microsoft, pryjdziecca pamučycca. Dy i mieć prablemy z zakonam — čutki pra «suśvietnuju amnistyju pirataŭ» nie spraŭdzilisia, a ŭ Biełarusi tym časam upieršyniu vypisany štraf za pirackuju Windows.