Biełaruskaja čyhunka patłumačyła praviły pravozu rovaraŭ u ciahnikach
Biełaruskaja čyhunka ŭ suviazi z uviadzieńniem novych praviłaŭ pieravozak pasažyraŭ, bahažu i hruzabahažu čyhunačnym transpartam patłumačyła, jak pravilna pieravozić rovary ŭ ciahnikach.
Adpaviednaja infarmacyja raźmieščana na sajcie BČ. Novyja praviły, jakija ŭstupili ŭ siłu ŭ hetym miesiacy, nakont pieravozu rovaraŭ nie ŭtrymlivajuć značnych źmien.
U adpaviednaści z p. 90 Praviłaŭ, rovar u nierazabranym vyhladzie, jak i raniej, u ciahniku ź nienumaravanymi miescami dazvalajecca pravozić nie bolš jak adzin u tambury vahona (pry ich najaŭnaści), a taksama ŭ aznačanych pieravozčykam miescach u vahonach za płatu, zhodna z zakanadaŭstvam.
U adpaviednaści z p. 88 novych Praviłaŭ, u košt normy biaspłatnaha pravozu ručnoj pakłažy dapuskajecca pieravozka adnaho rovara ŭ razabranym i ŭpakavanym vyhladzie pamieram pa sumie troch vymiareńniaŭ nie bolš za 200 santymietraŭ. Norma nie bolš za 200 sm pa sumie troch vymiareńniaŭ raspaŭsiudžvałasia na pieravozku rovaraŭ i ŭ staroj redakcyi dakumienta.
U toj ža čas, kali ŭ papiaredniaj redakcyi Pravił bujnahabarytnyja pradmiety, pamier jakich pa sumie troch vymiareńniaŭ pieravyšaŭ 200 santymietraŭ, da pieravozki ŭ jakaści ručnoj pakłažy ŭ pasažyrskich vahonach nie dapuskalisia (p. 68 Praviłaŭ), to dziejučaja redakcyja Praviłaŭ praduhledžvaje mahčymaść pravozu ŭ vahonach ŭ jakaści ručnoj pakłažy rovara va ŭpakoŭcy, kali pa sumie troch vymiareńniaŭ dadzienaja ručnaja pakłaža pieravyšaje 200 sm.
Tak, zamiest admovy pasažyru ŭ pieravozcy takoj ručnoj pakłažy, jamu budzie pry prajeździe ŭ ciahnikach rehijanalnych linij biźnies-kłasa, mižrehijanalnych i mižnarodnych linij prapanavana dadatkova aformić poŭny prajazny dakumient. Naprykład, košt prajezdu pa maršrucie Minsk—Orša ŭ płackartnym vahonie ciahnika mižrehijanalnych linij siońnia składaje 48 tys. biełaruskich rubloŭ. U tym vypadku, kali pasažyr choča pieravieźci ŭ płackartnym vahonie hetaha ciahnika rovar, pamiery jakoha ŭ razabranym vyhladzie pa sumie troch vymiareńniaŭ pieravyšajuć 200 sm, jamu treba dadatkova apłacić jašče 48 tys. rubloŭ. U vyniku ahulny košt prajezdu pasažyra razam z rovaram składzie 96 tys. rubloŭ. Košt prajezdu pasažyra razam z rovaram u płackartnym vahonie ciahnika mižrehijanalnych linij pa maršrucie Minsk—Maładziečna składzie 62 tys. rubloŭ, pa maršrucie Minsk—Baranavičy — 76 tys. rubloŭ.