U Minsku rezka ŭzrasła kolkaść chvorych na VIČ
U studzieni—lipieni ŭ Minsku zarehistravana 460 vypadkaŭ VIČ-infiekcyi, pakazčyk zachvorvańnia skłaŭ 21,9 vypadku na 100 tys. nasielnictva, paviedamlaje haradski centr hihijeny, epidemijałohii i hramadskaha zdaroŭja.
Za ŭvieś 2014 hod u stalicy było zarehistravana 387 vypadkaŭ VIČ. Z 1987 hoda siarod nasielnictva Minska zarehistravana 3.102 vypadki VIČ-infiekcyi, ź ich 1.100 (35,5%) — u žančyn.
Na 1 žniŭnia ŭ horadzie pražyvali 2.663 čałavieki ź VIČ-stanoŭčym statusam. Pakazčyk raspaŭsiudžanaści infiekcyi składaje 0,14% ahulnaj kolkaści nasielnictva. Najbolšaja kolkaść VIČ-pazityŭnych ludziej pražyvaje na terytoryi Zavodskaha (20,7%) i Frunzienskaha rajonaŭ (19,6%).
Za siem miesiacaŭ hetaha hoda 75% usich vypadkaŭ inficyravańnia byli źviazanyja ź injekcyjnym uviadzieńniem narkotykaŭ. Na dolu pałavoha šlachu prypała 20,4% vypadkaŭ, viertykalnaj pieradačy VIČ ad maci dziciaci — 0,7%.
Za 28-hadovy statystyčny pieryjad nazirańnia ŭ struktury asnoŭnych sposabaŭ inficyravańnia ŭdzielnaja vaha pałavoha šlachu pieradačy skłała 39,6%, na dolu niemiedycynskaha injekcyjnaha ŭviadzieńnia narkatyčnych rečyvaŭ prypała 53%, pieradača VIČ-infiekcyi ad maci dziciaci adbyvałasia ŭ 1% vypadkaŭ, u 1,5% pacyjentaŭ šlach pieradačy nie ŭstanoŭleny.
Z 1987 hoda pa 1 žniŭnia 2015 hoda ad VIČ-inficyravanych maci naradziłasia 429 dziaciej. Dyjahnaz «VIČ-infiekcyja» paćvierdžany 30 dzieciam va ŭzroście ad 0 da 14 hadoŭ, u čaćviarych ź ich dyjahnastavany ŚNID, adno dzicia pamierła.
U 98% vypadkaŭ pry vykanańni VIČ-stanoŭčaj ciažarnaj žančynaj usich prafiłaktyčnych i lačebnych mierapryjemstvaŭ naradžajucca zdarovyja dzieci. Pieradača virusu ad maci dziciaci adbyvajecca ŭ vypadku nievykanańnia rekamiendacyj urača, u tym liku admovy ad pryjomu antyretravirusnych preparataŭ.
Pa roznych pryčynach za 28-hadovy pieryjad pamierła 439 pacyjentaŭ ź VIČ. Za hety čas zarehistravana 359 vypadkaŭ ŚNIDu. U stadyi ŚNID pamierła 180 čałaviek.