Kontrsankcyi Rasii nie majuć efiektu. Naadvarot, Jeŭropa pavialičyła ekspart sielhaspradukcyi na 5%
Jeŭrakamisija padviała vynik: za hod paśla ŭviadzieńnia rasiejskaha praduktovaha embarha ekspart charčavańnia vyras na 5% (4,8 miljarda jeŭra). Choć pa šerahu kirunkaŭ, na jakich Rasieja była hałoŭnym spažyŭcom, zafiksavany spad 10—12%, embarha «skałanuła» i vytvorcaŭ, i zakanadaŭcaŭ i aktyvizavała pracu pa vychadzie na novyja rynki.
U pryvatnaści, ekspart u Kitaj, Turcyju i Jehipiet vyras na 20—30%, pieradaje «Niamieckaja chvala» sa spasyłkaj na spravazdaču jeŭračynoŭnikaŭ. U Rasii ž embarha pryviało da rostu cen.
Jeŭrakamisija apublikavała apošnija dastupnyja dadzienyja. Sa žniŭnia 2014 hoda, kali ŭstupiła ŭ siłu rasijskaje embarha, pa maj 2015. U hrašovym vyražeńni ekspart pradukcyi ahrakompleksu skłaŭ 105,6 młrd jeŭra, što na 4,8 młrd jeŭra bolš, čym u pieryjad z žniŭnia 2013 pa maj 2014 hadoŭ.
«Asnoŭnyja pośpiechi dasiahnuty dziakujučy pavieličeńniu praduktovaha ekspartu ŭ ZŠA, Kitaj, Šviejcaryju i šerah azijackich rynkaŭ, u pryvatnaści Hankonha i Paŭdniovaj Karei», — tłumačycca ŭ dakumiencie. Pavodle źviestak Jeŭrakamisii, značna vyras ekspart miasa, miasnoj i małočnaj pradukcyi.
Samy značny spad zafiksavany ŭ vytvorčaści harodniny i sadaviny, dzie Rasieja była klučavym rynkam dla jeŭrapiejskich fiermieraŭ. Vytvorčaść aharodniny ŭpała na 12%, a sadaviny — na 10%.
Pavodle źviestak Jeŭrakamisii, pastaŭki jeŭrapiejskich praduktaŭ u Paŭdniovuju Kareju vyraśli na 30,8%, u Kitaj — na 30, u Turcyju — na 27,1, u Hankonh — na 24,8, u Jehipiet — na 21,7 i ŭ ZŠA — na 15,1%. U dakładzie kanstatujecca, što zachady, nakiravanyja na źnižeńnie strat u vyniku rasijskich sankcyj, akazalisia paśpiachovyja.
U Jeŭrakamisii adznačyli, što fiermiery imknucca adaptavacca da novych umoŭ i vychodzić na novyja rynki. Sa svajho boku, jeŭračynoŭniki rapartavali ab aktyvizacyi pieramoŭ ab libieralizacyi handlovych režymaŭ z šeraham krain.