SK: Chłopcy, što ŭciakali ad DAI na MKAD, byli pad spajsami
Kiroŭcu, jaki 10 žniŭnia sprabavaŭ uciačy ad pieraśledu na MKAD, abvinavačvajuć u raspaŭsiudzie psichatropnych rečyvaŭ. Pra heta paviedamiŭ aficyjny pradstaŭnik USK pa Minsku Alaksandr Hierasimaŭ.
sk.gov.by
20-hadovy chłopiec na Honda nie padparadkavaŭsia patrabavańniu supracoŭnikaŭ DAI spynicca i sprabavaŭ uciačy. Pieraśled skončyŭsia, kali parušalniki ŭ rajonie vulicy Sasnovy Bor vyjechali za miežy prajeznaj častki. Milicyja zatrymała čaćviarych chłopcaŭ, adnamu ŭdałosia źbiehčy.
U sałonie mašyny pravaachoŭniki znajšli bieły parašok i rečyva raślinnaha pachodžańnia zialonaha koleru. Ekśpiertyza pakazała, što heta byli psichatropnyja rečyvy i hašyš.
Paźniej vyśvietliłasia, što ŭsie zatrymanyja znachodzilisia pad uździejańniem narkotykaŭ. Napiaredadni pajezdki jany ŭžyli zabaronienyja preparaty, a paraškom ich pačastavaŭ kiroŭca Honda, hašyšam — pryjaciel, jaki ŭciok.
Asoba apošniaha ŭstanoŭlenaja — heta raniej sudzimy za niezakonny abarot narkatyčnych srodkaŭ minčuk, jaki rehularna sam ich užyvaje.
Padčas pieratrusu ŭ kvatery aŭtaŭładalnika apieratyŭniki znajšli jašče kala 40 hramaŭ paraškapadobnaha psichatropnaha rečyva. Akramia taho, było vyjaŭlena miescaznachodžańnie niekalkich schovanak, praź jakija padazravany raspaŭsiudžvaŭ zabaronienyja rečyvy. Maładomu čałavieku pradjaŭlenaje abvinavačvańnie ŭ ździajśnieńni złačynstva, praduhledžanaha č.3 art.328 Kryminalnaha kodeksu — niezakonny abarot psichatropnych rečyvaŭ z metaj zbytu.