Muzykanty Trubetskoy admovilisia ad vykanańnia piesień hurtu «Lapis Trubiacki»
Rok-hurt Trubetskoy raźmiaściŭ u internecie novy klip na pieśniu «Zaviaršajecca hulnia». Hetym videarolikam muzykanty raźvitvajucca sa spadčynaj svajho lehiendarnaha papiarednika — kalektyvu «Lapis Trubiackoj» — i admaŭlajucca ad vykanańnia jaho repiertuaru, paviedamili ŭ pres-słužbie hurtu.
Słavuty pank-rok-kalektyŭ «Lapis Trubiackoj» paśla 24 hadoŭ pracy spyniŭ isnavańnie 1 vieraśnia 2014 hoda. Muzykanty hurtu zasnavali dva niezaležnyja prajekty — Brutto na čale ź lidaram «Lapisaŭ» Siarhiejem Michałkom i Trubetskoy na čale z Paŭłam Bułatnikavym. Nieŭzabavie pamiž novymi hurtami ŭźnikli roznahałośsi adnosna prava na vykanańnie piesień «Lapisa Trubiackoha».
«Prajšoŭ hod z momantu raspadu «Lapisaŭ» i ŭtvareńnia našaha kalektyvu, — skazaŭ Bułatnikaŭ. — Hałoŭnaje, da čaho my pryjšli, — nam bolš nie patrebnyja «kastyli» ŭ vyhladzie starych lapisavych chitoŭ. My ich pa-raniejšamu lubim i prynosim prabačeńni ŭsiamu ruchu Lyapis Crew. Mahčyma, častka fanaŭ spadziavalisia, što my jašče doŭha budziem śpiavać tolki «Jeŭpatoryju» i «Ty kinuła». Na žal ci, chutčej, na ščaście — nie».
«Hetym klipam my raźvitvajemsia z «Lapisami». Udvaja simvalična, što pieśniu «Zaviaršajecca hulnia» napisaŭ naš stary siabar, udzielnik adnaho ź pieršych składaŭ «Lapisa Trubiackoha» Alaksandr Rołaŭ, a epičnaje (nie pabajusia hetaha słova) videa zrabiŭ Alaksiej Cierachaŭ, aŭtar samych znakavych lapisavych klipaŭ — ad «Au» da «Voinaŭ śvietu». U kamandy Trubetskoy chutka vyjdzie debiutny albom, i pačniecca zusim inšaja historyja», — dadaŭ muzykant.
Jak paviedamlajecca, pieršy poŭnafarmatny albom hurtu Trubetskoy vyjdzie ŭ kastryčniku hetaha hoda. U jaho ŭvojduć novyja pieśni, jakija raniej nidzie nie vydavalisia. Muzykanty prezientujuć debiutny albom na kancertach u Minsku, Maskvie, Sankt-Pieciarburhu i Kijevie.