Słavakija paabiacała abskardzić u sudzie kvoty na mihrantaŭ
Premjer-ministr Słavakii Robiert Fica paabiacaŭ apratestavać u sudzie rašeńnie Jeŭrasajuza raźmiaścić u krainach-siabrach 120 tysiač biežancaŭ.
Pa słovach premjera, Słavakija maje namier padać pozvu ŭ cud Jeŭrasajuza, raźmieščany ŭ Luksiemburhu. Fica adznačyŭ, što jaho kraina nie moža pahadzicca ź sistemaj kvot ŭ cełym. Pavodle jaho słoŭ, jana iracyjanalnaja i biessensoŭnaja.
Sistema kvot była zaćvierdžanaja ŭ aŭtorak. Płan praduhledžvaje pierasialeńnie 120 tysiač mihrantaŭ pa ŭsich krainach ES u adpaviednaści z kvotami dla kožnaj dziaržavy. Akramia Słavakii, niezadavolenaść hetaj sistemaj užo vykazali Čechija, Rumynija i Vienhryja.
Słavakija ŭvachodzić u lik krain, jakija abviaścili ab uviadzieńni pahraničnaha kantrolu na fonie mihracyjnaha kryzisu ŭ Jeŭropie. Heta aznačaje pavieličeńnie kolkaści palicejskich i vybaračnyja pravierki dakumientaŭ na miažy ź Vienhryjaj i Aŭstryjaj.
Kožny dzień tysiačy mihrantaŭ, pieravažna siryjcaŭ, pierasiakajuć miežy Jeŭrasajuza i sprabujuć prasunucca ŭhłyb kantynienta, spadziejučysia atrymać prytułak u Hiermanii ci Šviecyi.
Pavodle acenki AAN, sioleta kolkaść mihrantaŭ u krainy Jeŭropy ŭžo pieravysiła 300 tysiač čałaviek.