U Minsku damovilisia pra advod tankaŭ, artyleryi i minamiotaŭ
Udzielniki trochbakovaj kantaktnaj hrupy pa Ukrainie na sustrečy 29 vieraśnia ŭ Minsku padpisali dakumient ab advodzie tankaŭ, artyleryi kalibram da 100 mm i minamiotaŭ kalibram da 120 mm. Pra heta žurnalistam paviedamiŭ pa vynikach pieramoŭ śpiecpradstaŭnik staršyni ABSIE ŭ kantaktnaj hrupie Marcin Sajdzik.
Sajdzik vykazaŭ udziačnaść členam padhrupy pa biaśpiecy za ich «vialikuju pracu». «Jany zrabili toje, što pavinny byli zrabić zhodna z kompleksam mier, i sapraŭdy intensifikavali praces, — zaznačyŭ pasoł. — Padpisana dapaŭnieńnie da kompleksu mier. Tekst padpisali pradstaŭniki Rasii, Ukrainy i ABSIE ŭ kantaktnaj hrupie. Spadary Zacharčanka i Płotnicki (lidary samaabvieščanych DNR i ŁNR. — BiełaPAN.) jaho jašče nie padpisali. Ale pradstaŭniki asobnych rajonaŭ Danieckaj i Łuhanskaj abłaściej spadar Pušylin i spadar Dziajnieha paabiacali, što, jak tolki jany viernucca dadomu, dakumient budzie padpisany».
Jeŭradypłamat udakładniŭ, što dapaŭnieńnie praduhledžvaje advod uzbrajeńnia na 15 km ad linii sutyknieńnia. Pavodle jaho słoŭ, heta budzie pravodzicca ŭ dva etapy i pačniecca praz dva dni paśla poŭnaha spynieńnia ahniu. Pieršy etap raźličany na 15 dzion, druhi — na 24 dni.
Pasoł paviedamiŭ, što śpiecyjalnaja manitorynhavaja misija ABSIE budzie ažyćciaŭlać manitorynh i vieryfikacyju pracesu advodu ŭzbrajeńniaŭ.
Sajdzik upeŭnieny, što dasiahnutyja siońnia pahadnieńni «buduć istotnym unioskam va ŭmacavańnie režymu spynieńnia ahniu i Minskaha pracesu ŭ cełym».