Ułachovič na sustrečy z vybarščykami ŭ Homieli: Ja ŭžo pieramoh
30 vieraśnia ŭ Homielskim dziaržaŭnym techničnym univiersitecie imia P.Suchoha prajšła sustreča kandydata ŭ prezidenty Mikałaja Ułachoviča z vybarščykami, u asnoŭnym studentami.
Kandydat koratka aznajomiŭ studentaŭ sa svajoj bijahrafijaj, zaŭvažyŭšy, što budavaŭ Bajkanur i BAM, 22 hady žyćcia addaŭ vajennaj pramysłovaści.
«Ja pryjšoŭ da vas siońnia nie z tym, kab vy prahałasavali asabista za mianie, ja chaču, kab vy prahałasavali za stabilnaść, za mir i spakoj u našaj krainie», — skazaŭ Ułachovič.
Jon zaklikaŭ studentaŭ zadavać pytańni, «navat samyja rezkija i niepryjemnyja», i nie bajacca adličeńnia. «Budziecie ŭsie na miescy», — paabiacaŭ jon. «Chto, kaniešnie, pabojvajecca — maŭčycie», — papiaredziŭ kandydat.
Havoračy ab šansach na pieramohu, palityk zajaviŭ, što jon užo pieramoh. «Ja pakazaŭ novyja tvary, jakija ničym nie horš za inšych. My bačym što pa televizary? Apazicyju, nacyjanalnych patryjotaŭ, Sieviarynca, Labiedźku, jakija pastajanna na ekranie kahości šturchajuć. Ja da Labiedźki i Sieviarynca zaŭsiody staviŭsia spakojna — ja ich navat nie viedaŭ. Ale na sustrečy z naziralnikami ABSIE Sieviaryniec raptam padniaŭsia i skazaŭ, što treba našych chłopcaŭ adpraŭlać va Ukrainu zmahacca. Ja skazaŭ, što ja suprać. A jany — Sieviaryniec i Labiedźka mnie — maŭlaŭ, davaj vyjdziem, pahavorym. Kaniešnie, Sieviaryniec zdarovy chłopiec, namiaŭ by mnie baki, ale Labiedźka! Ja ŭsio-taki byŭ staršynioj fiederacyi karate», — vykazaŭsia Ułachovič.
Jon vyrašyŭ bałatavacca ŭ prezidenty, kab «zaŭtra nie pračnucca ŭ toj krainie, dzie buduć kiravać Labiedźka i Sieviaryniec».
Studentaŭ cikavili pytańni — ci jość u kandydata kamanda, jakija jaho prapanovy pa skaračeńni źniešniaha doŭhu, budaŭnictvie žylla, staŭleńnie da adnapołych šlubaŭ.
«Ja chaču skazać moładzi — vy nie adčajvajciesia, usie my byli biez žylla, ja ź siamjoj byŭ u vahončyku. Ale chacia b treba viarnucca da sistemy internataŭ», — zaklikaŭ kandydat.
Nakont skaračeńnia źniešniaha doŭhu krainy ŭ palityka niama prapanoŭ. «Ja jak kandydat nie viedaju sumu źniešniaha doŭhu. Tamu ja nie mahu skazać šlach, jak skaracić jaho», — adkazaŭ Ułachovič.
Jon sam sabie zadaŭ pytańnie i sam ža adkazaŭ nakont supracoŭnictva ź ES. «Ja pracavaŭ u hetych prahramach, jakija finansujucca ź Jeŭrapiejskaha banka rekanstrukcyi i raźvićcia, finansavańnie tam idzie pastajannaje, ja sam abaraniaŭ hetyja prahramy, u Biełarusi jany nievialikija, va Ukrainie ŭ dziasiatki razoŭ bolš. I častka hetych hrošaj išła na revalucyi, jakija adbylisia potym, na hetyja ŭsie «aranžavyja revalucyi». Hetyja hrošy taksama pastolki pakolki. Što takoje ES? Zło — nie zło, ale kulturnyja suviazi treba raźvivać, i ekanamičnyja. Ź ES treba siabravać vielmi łoŭka. I bałansiroŭka Łukašenki mnie padabajecca — jon i ŭ tych paprosić, i ŭ tych. Ale ŭ rešcie rešt — karyść nam! Ale ja suprać dobraha cara», — abjaviŭ kandydat.
Dziaržaŭnaja simvolika, na dumku palityka, pavinna być novaja — «nie savieckaja, i nie byłaja palicejskaja». «Vy nie bačyli, i ja nie bačyŭ, ale moj dzied zahinuŭ ad ruk palicaja, u jaho paviazka była biełaja i čyrvonaja, jak ja mahu stavicca da takoha čałavieka z takoj paviazkaj. U nas novaja kraina z 1994 hoda, nu niachaj budzie novaja simvolika histaryčna supadać — bieły koler z čyrvonym», — skazaŭ Ułachovič.
Krym, pavodle jaho słoŭ, «vialikaje zavajavańnie Pucina», a DNR-ŁNR — «vielmi niepryjemny, žorstki i niepatrebny kanflikt».
Ułachovič zaklikaŭ «nie abiadniać siabie kulturaj». «Kali kažuć — davajcie tolki našu nacyjanalnuju, heta značyć Jakub Kołas, Janka Kupała, Kandrat Krapiva i pajšli-pajechali. A vialikija Tołstoj, Dastajeŭski i hetak dalej — hetych što, nie treba viedać? Na našu terytoryju pačali najazdžać kazaki z Ukrainy, Rasii i pačali prapaviedavać svaje idei. Voś tyja z DNR-ŁNR pryjeduć siudy, i što jany buduć prapaviedavać?» — zadaŭsia pytańniem kandydat.
Jon nie baicca BNF. «Ni ŭ Trusavie, ni ŭ kim inšym ja ničoha kiepskaha nie znajšoŭ, akramia adnaho — nacyjanalizm. Nacyjanalist — heta ŭsio roŭna budzie fašyst. Paviercie mnie, ja bačyŭ hetych ludziej na Majdanie, ja byŭ tam», — skazaŭ Ułachovič.
Palityk nie bačyć nieabchodnaści ŭ armii, kolkaść jakoj, pavodle jaho słoŭ, 73 tysiačy čałaviek. Dastatkova było b i nacyjanalnaj hvardyi.
Da tych, chto ŭstupaje ŭ adnapołyja šluby, kandydat stavicca hetak ža sama, jak i da mužčyn, jakija ženiacca na maładych dziaŭčatach. «Jak da durniaŭ», — udakładniŭ svaju pazicyju palityk.
Ułachovič unios prapanovu pa reformie sistemy MUS: treba načalnikaŭ RAUS vybirać, jak šeryfaŭ u ZŠA.