Niezaležnym naziralnikam supraćstajać naziralniki ad ułady — «Prava vybaru»
Ułady padrychtavalisia supraćstajać niezaležnym naziralnikam, jakija fiksujuć parušeńni vybarčaha zakanadaŭstva. Ab hetym zajaviŭ adzin z kaardynataraŭ kampanii «Prava vybaru — 2015» Aleś Siłkoŭ 10 kastryčnika na pres-kanfierencyi ŭ Minsku.
fota Alesia Pileckaha
«Na kožnym učastku, dzie siadzić naš naziralnik, siadziać dva-try pradstaŭniki inšych arhanizacyj. Da kanca dnia jany pišuć akt ab tym, što vybary prajšli paśpiachova i pryhoža, i zdajuć jaho staršyni kamisii», — skazaŭ jon.
Pry hetym Siłkoŭ adznačyŭ, što, dziakujučy dziejańniam praŭładnych naziralnikaŭ, moža być pazbaŭleny akredytacyi inšy naziralnik. Tak, paviedamiŭ jon, adnaho naziralnika kampanii «Prava vybaru» pazbavili akredytacyi na padstavie akta inšych naziralnikaŭ, što «jon padbiahaŭ da skryni dla hałasavańnia, da stała, pravodziŭ apytańnie nasielnictva».
Siłkoŭ nahadaŭ, što naziralniki kampanii «Prava vybaru» prapanoŭvali ŭčastkovym kamisijam vieści adkryty padlik hałasoŭ z demanstracyjaj biuleteniaŭ usim naziralnikam. «Kali pryjšli adkazy, to ŭ nas stvaryłasia ŭražańnie, što ŭsie jany napisanyja ŭ adnym centry. U ich napisana, što dziakujuć za prapanovu, ale buduć ličyć zhodna z zakonam. Ale ž naša prapanova nie razychodzicca z zakonam», — adznačyŭ jon.
Za 9 kastryčnika, u čaćviorty dzień daterminovaha hałasavańnia, naziralniki kampanii padali 42 skarhi na parušeńnie vybarčaha zakanadaŭstva. Ahulnaja kolkaść padadzienych za čatyry dni skarhaŭ skłała 319.
Padčas daterminovaha hałasavańnia 1.344 naziralniki kampanii viaduć bieśpierapynny padlik vybarščykaŭ na 672 vybarčych učastkach. Pavodle źviestak naziralnikaŭ, za čatyry dni na ŭčastki pryjšło 216.888 čałaviek, učastkovych kamisij — 226.474. Razychodžańnie z aficyjnymi źviestkami skłała 9.586 čałaviek, ci 4,4%.
U Minsku ahulnaja kolkaść hramadzian, jakija pryjšli na 99 vybarčych učastkaŭ, pavodle źviestak naziralnikaŭ, skłała 32.067 čałaviek, pavodle źviestak kamisij — 34.749. Razychodžańnie z aficyjnymi źviestkami skłała 2.682 čałavieki, ci 8,4%.