U Kobrynie sudziać nastaŭnic, pry jakich u akvaparku patanuła školnica
U sudzie Kobrynskaha rajona pačynajecca razhlad kryminalnaj spravy ab hibieli niepaŭnaletniaj školnicy ŭ miascovym akvaparku.
Abvinavačanymi pa spravie prachodziać dźvie nastaŭnicy Zavieršskaj bazavaj škoły Drahičynskaha rajona. Im vystavili abvinavačańnie ŭ nienaležnym vykanańni abaviazkaŭ pa zabieśpiačeńni biaśpieki žyćcia i zdaroŭja dziaciej, što paciahnuła pa nieaściarožnaści śmierć małaletniaha.
Płanujecca, što sudovyja słuchańni buduć adkrytymi. Na pieršaje pasiedžańnie vyklikanyja abvinavačanyja, paciarpiełyja i śviedki. Častku ź ich dapytajuć siońnia, inšym zahadana źjavicca ŭ sud 21 kastryčnika.
Niaščasny vypadak adbyŭsia 12 červienia padčas ekskursii školnikaŭ u Kobrynski akvapark. Dziciačuju hrupu supravadžali dźvie nastaŭnicy, jakija mieli bolš za 15 hadoŭ piedahahičnaha stažu. Darečy, adna ź ich była kłasnaj kiraŭnicaj dziaŭčynki. U akvaparku z nastaŭnicami parviali instruktaž i źviarnuli ŭvahu na nieabchodnaść sačyć za dziećmi ŭ vadzie.
Pa viersii śledstva, darosłyja pakinuli biez uvahi siamihadovuju školnicu, jakaja nie ŭmieła płavać. Adna z nastaŭnic prachodziła mima basiejna i navat nie źviarnuła ŭvahi, što školnica patanuła. Patanułuju dziaŭčynku dastaŭ z vady vypadkovy naviedvalnik akvaparku. Vyjaviłasia, što druhakłaśnica była pad vadoj nie mienš za 10 chvilinaŭ.
U stanie kliničnaj śmierci jaje dastavili spačatku ŭ rajonnuju, a potym u dziciačuju abłasnuju lakarniu. Miedyki apynulisia biaśsilnymi: dziaŭčynka pamierła 26 červienia.