U Biełarusi rychtujecca novaja hienieralnaja schiema raźvićcia prydarožnaha servisu
U Biełarusi idzie padrychtoŭka novaj hienieralnaj schiemy raźvićcia prydarožnaha servisu na respublikanskich aŭtadarohach da 2020 hoda, paviedamiŭ načalnik adździeła zachavanaści aŭtamabilnych daroh i prydarožnaha servisu Ministerstva transpartu i kamunikacyj Siarhiej Lavončyk 21 kastryčnika na pres-kanfierencyi z nahody Dnia aŭtamabilista i darožnika.
Pavodle jaho słoŭ, zaviaršyć raspracoŭku novaj hienieralnaj schiemy płanujecca da kanca 2015 hoda. U cełym jana budzie ŭtrymlivać tablicy ź isnymi abjektami, abjektami, jakija budujucca, i mierkavanymi. Hałoŭnaje adroźnieńnie novaj schiemy — pryncyp kompleksnaści, jaki budzie zakładzieny ŭ jaje asnovu.
«Papiaredniaja schiema była raźličanaja da 2015 hoda. Ale žyćcio nie staić na miescy. Pry farmiravańni novaj my zychodzim z pryncypu kompleksnaści, heta značyć nie budzie tak, što praz kožnyja dva-try kiłamietry raźmieściacca spačatku kafe, potym stajanka, zatym AZS. My sprabujem usio abjadnać, kab heta byŭ adzin kompleksny abjekt praz kožnyja 40-50 kiłamietraŭ, dzie ludzi zmohuć atrymać u adnym miescy ŭsie pasłuhi i absłuhoŭvańnie», — rastłumačyŭ Lavončyk.
Pradstaŭnik Mintransa zaklikaŭ pradprymalnikaŭ i arhanizacyi, jakija žadajuć zbudavać svaje abjekty, źviartacca ŭ Ministerstva transpartu i kamunikacyj i prapanoŭvać svajo bačańnie abjektaŭ i miescaŭ dla ich.
«My budziem uklučać ich prapanovy ŭ prahramu, i jany «biazbolna» najbližejšym časam pačnuć budavać hetyja abjekty», — adznačyŭ Lavončyk. Pavodle jaho słoŭ, prapanovy buduć prymać u Mintransie da kanca 2015 hoda, a paśla zaćviardžeńnia schiemy pradprymalniki zmohuć vybrać z socień varyjantaŭ najbolš prymalnyja dla siabie. Pry hetym Mintrans nadaje ŭvahu tamu, kab pierśpiektyŭnyja abjekty nie traplali na ziemli sielhaspryznačeńnia. Akramia transpartnikaŭ u pracy pa vydzialeńni ŭčastkaŭ niepasredny ŭdzieł biaruć abłvykankamy i rajvykankamy.