ZTE pieradała biełaruskamoŭnaj himnazii №23 płanšety, multymiedyjny prajektar i abctalavańnie dla wi-fi FOTAFAKT
Uračystaja cyrymonija pieradačy elektronnych srodkaŭ navučańnia — płanšetaŭ, multymiedyjnaha prajektara i abstalavańnia dla suviazi wi-fi — ad karparacyi ZTE adbyłasia siońnia ŭ minskaj biełaruskamoŭnaj himnazii №23.
Udzieł u mierapryjemstvie pryniali Nadzvyčajny i Paŭnamocny Pasoł Kitaja Cuj Cymin, pieršy namieśnik ministra adukacyi Vadzim Bohuš, dyrektar ZTAA «ZTIE» Tan Łuchaa.
Vystupajučy na ŭračystaj cyrymonii, Cuj Cymin adznačyŭ, što biełaruska-kitajskaje partniorstva aktyŭna raźvivajecca va ŭsich abłaściach, u tym liku ŭ śfiery adukacyi.
«Dzieci i moładź — heta naša budučynia. Kitajski ŭrad nadaje vialikaje značeńnie prafiesijnamu raźvićciu maładoha pakaleńnia Kitaja. I ŭ Biełarusi vielmi dobraja adukacyjnaja padrychtoŭka. Tamu my asabliva rady ŭnieści svoj układ u vialikuju pracu pa raźvićci maładoha pakaleńnia», — skazaŭ pasoł Kitaja.
Sa svajho boku dyrektar ZTAA «ZTIE» Tan Łuchaa adznačyŭ, što vykarystańnie elektronnych srodkaŭ navučańnia karparacyi pavysić efiektyŭnaść navučańnia školnikaŭ.
«My rady sadziejničać supracoŭnictvu Biełarusi i Kitaja, asabliva ŭ śfiery adukacyi. Pieradača elektronnych srodkaŭ navučańnia — naš ŭkład u dynamičnyja adnosiny dźviuch krain. Spadziajemsia, što hety krok stanie dobrym prykładam dvuchbakovaha ŭzajemadziejańnia dźviuch krain», — padkreśliŭ Tan Łuchaa.
Słovy ŭdziačnaści za padtrymku dziaciej, ich tvorčaha patencyjału, a taksama ŭ vyvučeńni kitajskaj movy vykazała dyrektar himnazii Iryna Pasiukievič.
«U himnazii nieabchodna było madernizavać adukacyjny praces, jaki b dazvoliŭ vyvieści na novy ŭzrovień jakaść vykładańnia, u tym liku i kitajskaj movy», — skazała jana.
Iryna Pasiukievič adznačyła, što staličnaja himnazija №23 pieršaja ź biełaruskaj movaj navučańnia, u jakoj pačałosia vyvučeńnie kitajskaj movy. Siońnia jana adzinaja ŭ Minsku ź biełaruskaj movaj navučańnia, u jakoj vyvučajecca kitajskaja mova.