Pamočnik prezidenta: Ručnoje kiravańnie ekanomikaj tarmozić reformy
Strukturnyja reformy praduhledžvajuć źmienu stratehii, ale heta niemahčyma va ŭmovach ručnoha kiravańnia ekanomikaj. Takuju dumku vykazaŭ pamočnik prezidenta pa ekanamičnych pytańniach Kirył Rudy, vystupajučy 23 kastryčnika na mižnarodnaj kanfierencyi ŭ Minsku «Prablemy prahnazavańnia i dziaržaŭnaha rehulavańnia sacyjalna-ekanamičnaha raźvićcia».
«Ručnoje kiravańnie ekanomikaj prytuplaje nieabchodnaść reform, dazvalaje ručnym sposabam vyrašać isnujučyja prablemy, utojvać stratehičnyja pamyłki, nie rabić dakładnych vysnoŭ i, adpaviedna, nie pravodzić reformy», — padkreśliŭ Rudy.
Jon źviarnuŭ uvahu, što ŭ Biełarusi ŭžo prykładna «pałova ekanomiki pryvatnaja, pracujuć na rynku zamiežnyja kampanii, prysutničajuć inšyja elemienty rynkavaj ekanomiki».
Pry takoj struktury ekanomiki ručnoje kiravańnie nie moža być efiektyŭnym, miarkuje Rudy.
«Jak adyści ad ručnoha kiravańnia ekanomikaj? Pieršaje — decentralizacyja i delehavańnie paŭnamoctvaŭ. Heta azy mieniedžmientu. Druhoje — raździaleńnie finansaŭ dziaržavy i finansaŭ dziaržpradpryjemstvaŭ», — miarkuje jon.
Na jaho dumku, nieabchodna pravieści miažu dla ŭmiašańnia dziaržavy ŭ finansy dziaržpradpryjemstvaŭ. «Nacyjanalnaja biaśpieka, sacyjalnaja śfiera i naturalnyja manapolii — try kirunki, jakija možna adnieści da finansaŭ dziaržavy. Usio, što zastajecca za miežami hetych kirunkaŭ, možna adpravić u režym volnaha płavańnia», — miarkuje Rudy.
Pavyšeńnie finansavaj samastojnaści dziaržpradpryjemstvaŭ, ličyć jon, pryviadzie da taho, što častka ź ich, jakija stanuć niežyćciazdolnyja bieź dziaržpadtrymki, vidać, daviadziecca saniravać, likvidavać. «U niejkich pytańniach, mahčyma, daviadziecca iści na pryvatyzacyju», — vykazaŭ mierkavańnie pamočnik prezidenta pa ekanamičnych pytańniach.
Aprača taho, adychod ad ručnoj sistemy kiravańnia ekanomikaj praduhledžvaje pierachod na dziaržaŭnaje kiravańnie, aryjentavanaje na vynik. «Takaja sistema pryviadzie da taho, što zarpłata i dalejšaja karjera kožnaha dziaržsłužačaha budzie naŭprost zaležać ad vykanańnia pakazčykaŭ efiektyŭnaści. Heta sistema pracuje ŭ bolšaści krain śvietu», — kanstatavaŭ Rudy.
15 kastryčnika namieśnik ministra ekanomiki Dźmitryj Kruty paviedamiŭ, što ŭłady płanujuć apublikavać prahramu strukturnych reform ekanomiki ŭ kancy kastryčnika. «28 kastryčnika. Pakul taki staić termin», — skazaŭ jon. Pavodle słoŭ čynoŭnika, prahrama strukturnych reform budzie adnoj z častak prahramy sacyjalna-ekanamičnaha raźvićcia krainy na nastupnuju piacihodku. «Da jaje (prahramy sacyjalna-ekanamičnaha raźvićcia na 2016—2020 hady) budzie iści pakiet nieabchodnych strukturnych źmianieńniaŭ. Tam kala 50-70 zakonaŭ, ukazaŭ i inšych aktaŭ», — paviedamiŭ namieśnik ministra.
Miž tym 20 kastryčnika na naradzie pa aktualnych pytańniach raźvićcia krainy Łukašenka zajaviŭ: «Niekatoryja kažuć: jość kredyt davieru i treba pravieści niepapularnyja miery, pryčym vielmi chutka, čytaj — treba chucieńka rezać pa žyvomu. Kali budziecie prezidentami, tady budziecie rezać. Ja nikoha i ničoha rezać nie maju namieru».