Patryjatyčnyja i prajeŭrapiejskija partyi pieramahajuć na miascovych vybarach va Ukrainie
abnaŭlajecca
Dziejučy kiraŭnik stalicy Ukrainy Vital Kličko nabiraje 40,4% i źjaŭlajecca lidaram siarod kandydataŭ u mery Kijeva pavodle źviestak ekzit-poła Kamiteta vybarščykaŭ Ukrainy.
Fota UNIAN
Astatnija kandydaty ŭ mery ad Klička adstali daloka. Śledam za im iduć Uładzimir Bandarenka (partyja «Baćkaŭščyna» Julii Cimašenki) 8,7%, Alaksandr Amielčanka (były mer pry Kučmu) 8,1%, Siarhiej Husoŭski («Samapomač») — 8%, Barysłaŭ Biareza («Pravy siektar») — 7,5%.
Na vybarach deputataŭ Kijeŭrady, Błok Piatra Parašenki «Salidarnaść» nabiraje 28%. 10,3% atrymlivaje «Samapomač», 10,1% — «Baćkaŭščyna», 9,7% — ultrapravaja «Svaboda».
Siońnia, 25 kastryčnika, va Ukrainie prajšli miascovyja vybary — čarhovyja vybary deputataŭ abłasnych, rajonnych, haradskich, sielskich i pasiałkovych radaŭ, haradskich, pasiałkovych, viaskovych kiraŭnikoŭ.
Ahułam pa krainie pieramahaje Błok Piatra Parašenki «Salidarnaść». Śledam za im iduć jaho partniory pa ŭradavaj kaalicyi «Samapomač» i «Baćkaŭščyna». Tolki na ŭschodzie Ukrainy vysoki vynik pakazaŭ Apazicyjny błok, utvorany na ruinach kolišniaj Partyi rehijonaŭ. Naprykład, pavodle ekzit-połaŭ, u Charkavie 59% hałasoŭ nabiraje były mer horada Hienadź Kiernes, viadomy jak «Hiepa». A ŭ Adesie adnosnuju bolšaść źbiraje były mer Truchanaŭ.
Vysoki vynik na zachadzie i ŭ centry krainy hetym razam pakazali ultrapravyja partyi «Svaboda» i «Pravy siektar», jakija išli na vybary asobna. «Svaboda» naradziłasia ŭ kołach zachodnieŭkrainskich radykałaŭ. A «Pravy siektar» maje karani va ŭschodniaj Ukrainie, i jaho nacyjanalizm — nie etničny, a dziaržaŭnicki.
Na ciapierašnich vybarach vybirajuć meraŭ 358 haradoŭ abłasnoha i rajonnaha značeńnia. Pryčym u haradach z kolkaściu vybarščykaŭ zvyš 90 tys čałaviek jany adbuducca ŭ dva tury, kali ŭ pieršym tury nivodny z kandydataŭ nie nabiare 50% hałasoŭ.
Meraŭ haradoŭ i sielskich i pasiałkovych kiraŭnikoŭ, a taksama deputataŭ sielskich i pasiałkovych radaŭ abirajuć pa mažarytarnaj sistemie.
Deputataŭ abłasnych, rajonnych, haradskich i rajonnych u haradach radaŭ (u cełym heta 869 miascovych radaŭ) vybirajuć pa praparcyjnaj sistemie z adkrytymi partyjnymi śpisami.