Pjanaja vinoŭnica DTZ u Homielskim rajonie kinułasia z kułakami na supracoŭnika DAI
U dačynieńni da žycharki Homielskaha rajona, jakaja ŭčyniła DTZ 24 kastryčnika, raspačataja kryminalnaja sprava za «hvałt abo prymianieńnie hvałtu ŭ dačynieńni da supracoŭnika AUS».
U hety dzień inśpiektary DAI atrymali infarmacyju pra DTZ u pasiołku Uryckaje i sprobu vinoŭnika ŭciačy, paviedamiła inśpiektar adździaleńnia pa ahitacyi i prapahandzie DAI UUS Homielskaha abłvykankama Natalla Chałalejenka.
«Adzin z supracoŭnikaŭ, kali prybyŭ na miesca zdareńnia, padyšoŭ da žančyny i, nazvaŭšy siabie, pacikaviŭsia, chto byŭ za rulom aŭtamabila. Žančyna, jakaja była napadpitku, rastłumačyła, što za rulom byŭ jaje muž, — skazała inśpiektar. — Dla razmovy i afarmleńnia pravaparušeńnia kiroŭcu aŭtamabila, jaki, darečy, taksama byŭ pjany, było prapanavana prajści ŭ słužbovy aŭtamabil».
«Jak tolki mužčyna sieŭ u słužbovy aŭtamabil, u natoŭpie prachožych, dzie była i žonka parušalnika, supracoŭniki pačuli razmovu na pavyšanym tonie, jakaja pierachodziła na kryk. Adzin z supracoŭnikaŭ DAI vyjšaŭ z aŭtamabila i padyšoŭ da hrupy ludziej, kab vyśvietlić pryčynu kanfliktu. Kali supracoŭnik nabliziŭsia da ich, na jaho nalacieła žančyna z pahrozami, stała bić i chapać jaho za formu. Jaho naparnik paśpiašaŭsia na dapamohu kalehu. Spravakavaŭšy bojku, začynščyca kinułasia da słužbovaha aŭtamabila, kab źniščyć dakumienty. Tolki z dapamohaj naručnikaŭ supracoŭnikam DAI ŭdałosia supakoić muža i žonku», — paviedamiła Chałalejenka.
Jak paźniej vyśvietliłasia, za rulom aŭtamabila, jaki ŭčyniŭ DTZ, znachodziłasia mienavita žančyna, a nie jaje muž. Chulihanku dastavili ŭ narkadyspansier, ale ad prachodžańnia ahladu jana admoviłasia. U vyniku žančyna paniasie nie tolki administracyjnuju adkaznaść u vyhladzie bujnoha štrafu i pazbaŭleńnia prava kiravańnia mašynaj na try hady, ale i kryminalnuju.