Źnikłuju lohkaatletku Juliju Bałykinu šukajuć pa lasach i palach Minskaj vobłaści
Kab vyśvietlić miescaznachodžańnie eks-čempijonki Biełarusi pa sprynterskim biehu i dziciačaha treniera BFST «Dynama» Julii Bałykinaj, pračesvajucca lasy, pali i bałoty ŭ Minskaj vobłaści. Miarkujučy pa ŭsim, na miesca moh ukazać sam abvinavačany pa artykule «Zabojstva» Dźmitryj V. — były bojfrend lohkaatletki.
Ale vynikaŭ dahetul niama. Pa-raniejšamu zastajecca mizerny šaniec, što dziaŭčyna zastałasia žyvoj.
Nahadajem, što ŭ subotu 28-ha kastryčnika Julija Bałykina pajechała na aŭtamabili dadomu. I z taho času pierastała vychodzić na suviaź ź siabrami i kalehami.
Pakul spartsmienku nie znajšli, składana detalna vyśvietlić, što zdaryłasia. Ale supracoŭniki Śledčaha kamiteta nie prosta tak raspačali spravu pa artykule «Zabojstva». U kvatery Bałykinaj i jaje aŭtamabili «Kia Rio» byli znojdzienyja rečyvy buraha koleru i inšyja ślady, jakija ŭkazvali na zabojstva. Sam Dźmitryj V. daje pakazańni i biare ŭdzieł u śledčych dziejańniach. Ale ci nie sprabuje jon zabłytać pravaachoŭnikaŭ - pytańnie.
Vyhladaje, što padazravany padčas kanfliktu ŭ kvatery Bałykinaj nanios joj traŭmy. Potym uziaŭ aŭtamabil dziaŭčyny i vyjechaŭ na im sa stalicy ŭ adzin z rajonaŭ Minskaj vobłaści. Potym viarnuŭsia nazad.
Ekśpierty-kryminalisty vyśviatlajuć, što mahło padšturchnuć padazravanaha da złačynstva — stan afiektu na fonie svarki, ałkahol ci psichatropy. Na hety kont byli praviedzienyja ekśpiertyzy. Vynikaŭ pakul niama.
Zdareńnie ź Julijaj Bałykinaj šakavała usiu zbornuju Biełarusi pa lohkaj atletycy. Ale ŭ kaleh-spartsmienaŭ taksama mała infarmacyi. Zbolšaha jany atrymlivajuć jaje sa ŚMI.
U apošnija paru hadoŭ za Julijaj sačyli nie vielmi pilna, bo jana znachodziłasia pad dvuchhadovaj dyskvalifikacyjaj. Voś-voś Bałykina źbirałasia pryniać rašeńnie, ci varta viartacca ŭ vialiki sport.
«Jana razhladała takuju mahčymaść, ale tam dastatkova składanaja pracedura vychadu z dyskvalifikacyi i heta davoli doraha kaštuje. Usio kładziecca na plečy dyskvalifikavanaha spartsmiena. I jana pryniała rašeńnie, što nie budzie viartacca, a zastaniecca dziciačym trenieram», — uzhadvaje staršy trenier pa spryncie nacyjanalnaj zbornaj Jaŭhienija Vaładźko.
Darečy, kaleha Bałykinaj pa dziciačaj siekcyi i pačaŭ pieršym bić tryvohu pra jaje źniknieńnie.