«Biełavija» pierakanałasia ŭ biaśpiecy aeraporta Šarm-el-Šejch, čartary buduć vykonvacca ŭ štatnym režymie
Pra heta paviedamili ŭ pres-słužbie avijakampanii.
Kiraŭnictva i słužba avijacyjnaj biaśpieki avijakampanii «Biełavija» praviali rabočyja sustrečy z kiraŭnikami mižnarodnaha aeraporta Šarm-el-Šejch, pradstaŭnikami jehipieckich śpiecsłužbaŭ, palicyi i armii. U pracesie inśpiektavańnia pravierany pracedury pa nadhladzie na terytoryi aeraporta transpartu, pasažyraŭ, bahažu i ručnoj pakłažy. «Ciapier pracuje šmatsłojnaja pracedura pravierki. Spačatku nadhlad pravodzicca techničnymi srodkami, paśla čaho prachodzić asabisty nadhlad usich pasažyraŭ, bahažu i ručnoj pakłažy biez vyklučeńnia supracoŭnikami słužby avijacyjnaj biaśpieki i palicyi aeraporta. Taksama ŭviedzieny dadatkovy kantrol śpiecyjalnymi słužbami mižnarodnaha aeraporta Šarm-el-Šejch za vykanańniem pravił praviadzieńnia asabistaha nadhladu i pravierki bahažu», — padkreślili ŭ avijakampanii.
«Samastojna pierakanaŭšysia ŭ zabieśpiačeńni biaśpieki na vysokim uzroŭni ŭ mižnarodnym aeraporcie Šarm-el-Šejch, avijakampanija «Biełavija» płanuje vykanańnie čartarnych rejsaŭ u Jehipiet u štatnym režymie», — skazaŭ namieśnik hiendyrektara pa markietynhu i źniešnieekanamičnaj dziejnaści avijakampanii Ihar Čarhiniec.
Na zaŭtra ŭ «Biełavija» zapłanavana vykanańnie dvuch čartarnych rejsaŭ u Churhadu.
Ciapier šerah dziaržaŭ, u tym liku členaŭ Jeŭrapiejskaha sajuza, praviali inśpiekcyi, akazali sadziejničańnie ŭ palapšeńni pracedur nadhladu i vysoka acanili stupień biaśpieki aeraportaŭ Šarm-el-Šejch i Churhady. U poŭnym abjomie pradaŭžajuć vykonvacca rejsy i pieravozka pasažyraŭ u abodvuch napramkach z Hiermanii, Italii, Bałharyi, Bielhii, Aŭstryi, Vienhryi, Hruzii, Ukrainy, Saudaŭskaj Aravii, Kuviejta, Tunisa i inš. U toj ža čas avijakampanii Vialikabrytanii i Rasii spynili ŭvoz turystaŭ i ažyćciaŭlajuć tolki vyvaz ich ź Jehipta.