Ukrainskich žurnalistaŭ abvinavacili ŭ pravozie ekstremisckaj pradukcyi i piać hadzin trymali na biełaruskaj miažy
Piać hadzin pratrymali na miažy biełaruskija mytniki žurnalistaŭ ukrainskaha Centralnaha kanała (CK). Kanfiskavanyja knihi i dyski.
Alaksandr Donij i jaho kalehi, jakija vypuskajuć prahramu «Ostańnia barikada» («Apošniaja barykada»), jechali ŭ Vilniu. Jak paviedamiŭ Donij na svajoj staroncy ŭ fejsbuku, pry pierasiačeńni miažy biełaruskija mytniki abvinavacili ich u pravozie ekstremisckaj litaratury i aŭdyjopradukcyi. U vyniku ŭ žurnalistaŭ kanfiskavali piać dyskaŭ dakumientalnaha filma Ivana Kaniŭca «Ukrainśka rievolucija» pra padziei 1917-1921 hadoŭ, dyski «Muzična sotnia. Majdan», «Ostańnia barykada» (antałohija patryjatyčnych piesień) i film ab Haładamory. Taksama kanfiskavana 11 asobnikaŭ roznych knih.
«Asablivuju cikavaść vyklikali fotaaparaty, videakamiera i štatyŭ, — adznačyŭ Donij. — «Ostańnia barikada» — heta prahrama pra kulturu, jakaja vychodzić na Centralnym kanale, ale takija našy tłumačeńni nie zadavolili mytnikaŭ. Nadpis na mikraaŭtobusie «Ostańnia barikada» taksama nazvali pravakacyjaj i patrabavali ad nas jaho prybrać. Dla Biełarusi našy pieśni i hieroj Ukrainy Laŭko Łukjanienka, Haładamor — heta ekstremizm. Raju nikomu nie jeździć praź Biełaruś tranzitam. Tam SSSR, tam «ruski śviet», tam Rasijaj pachnie», — napisaŭ Donij.
U pres-słužbie Homielskaj pamiežnaj hrupy paviedamili, što ŭ pamiežnikaŭ nie było pretenzij da ŭkrainskich žurnalistaŭ. U adździele ideałahičnaj pracy Homielskaj mytni adznačyli, što nie majuć infarmacyi ci kamientara pa dadzienaj situacyi.