U Łatvii bastujuć nastaŭniki: ich zarobak składaje 640—800 jeŭra, patrabujuć pavyšeńnia
U piatnicu ŭ Łatvii prachodzić zabastoŭka nastaŭnikaŭ, vychavacielaŭ dziciačych sadkoŭ, a taksama rabotnikaŭ niekatorych VNU, u jakoj biaruć udzieł 24 546 čałaviek. Strajk padtrymali 912 navučalnych ustanoŭ, pieravažnaja bolšaść ź ich — siarednija i asnoŭnyja škoły, piša delfi.lv. Usiaho ŭ Łatvii kala 2,4 tys. navučalnych ustanovaŭ.
Miarkujecca, što ŭ zabastoŭcy prymuć udzieł kala 80% siabroŭ Łatvijskaha prafsajuza rabotnikaŭ adukacyi i navuki (LIZDA).
Udzielniki akcyi vystupajuć suprać novaj sistemy apłaty pracy piedahohaŭ, jaki raspracavała Ministerstva adukacyi i navuki.
Łatvijski prafsajuz rabotnikaŭ adukacyi i navuki — najbujniejšy pa kolkaści rabotnikaŭ u Łatvii prafsajuz. U jaho ŭvachodziać krychu bolš za 50% tych, chto pracuje ŭ śfiery adukacyi, asabliva mocnyja jaho pazicyi pa-za miežami Ryhi.
Prafsajuz nie zhodny z chodam reformaŭ sistemy adukacyi i kolkaściu hrošaj, jakija dziaržava hatova vydzielić na zarobak nastaŭnikaŭ.
Raniej staŭka piedahoha — 21 hadzina ŭ tydzień — składała 420 jeŭra ŭ miesiac. Potym, zhodna z novym zakonam, staŭka skasoŭvałasia, a źjavilisia «štatnaja adzinka»: kolkaść pracoŭnych hadzin vyrasła da 36.
Ale ciapier praduhledžanaja roźnica ŭ apłacie z uvahi na kolkaść vučniaŭ u kłasie. Tak u maleńkich kłasach da 10 vučniaŭ, mierkavałasia płacić 800 jeŭra «brudnymi», u kłasach da 20 čałaviek — da 900 jeŭra, u vialikich kłasach, bolš za 25 dziaciej, — da 1000 jeŭra «brudnymi» (padachodny padatak u Łatvii składaje 21%), z h.n. čystymi tut zarobak składaje 640, 710 i 790 jeŭra.
Tamu narakańni i vyklikaje žadańnie Minadukacyi praciahvać reformu «hrošy iduć za vučniem» i vynikajučy z hetaha «videlec» zarobkaŭ piedahohaŭ sielskich i staličnych škoł.
Kali ŭ acency budučych zarobkaŭ nastaŭnikaŭ škoł prafsajuz i Minadukacyi razychodziacca nie tak, kab surjozna (40-60 jeŭra ŭ miesiac roźnicy — da zarobku na ŭzroŭni 800—1050 jeŭra ŭ miesiac), to za zarobki piedahohaŭ daškolnych ustanoŭ idzie sapraŭdnaja vajna, dadaje Delfi.
U pryvatnaści, u prafsajuzie chočuć, kab vychavalniki zarablali ad 700 da 800 jeŭra, a dziaržava hatova płacić ad 580 da 760.
Prafsajuz taksama choča damahčysia ad dziaržavy jasnaj kolkaści pracoŭnych hadzin piedahoha (źviazanyja z ulikam t.zv. «niekantaktnych» hadzin — praviedzienych pa-za kłasam), kab jon na samaj spravie moh zarablać poŭnuju staŭku.
Kamieniem sutyknieńnia źjaŭlajucca i zarobki biblijatekaraŭ i nastaŭnikaŭ-vychavalnikaŭ internataŭ, staŭka jakich na bolš čym 200 jeŭra mienš, čym u ich kalehaŭ nastaŭnikaŭ-łahapiedaŭ, školnych psichołahaŭ i h.d.
Chočuć u Prafsajuzie damahčysia i pavyšeńnia zarobkaŭ rabotnikaŭ VNU.
Pryčym surjoznaha pavyšeńnia: na sumy ad 144 da 425 jeŭra, tak kab asistent atrymlivaŭ minimum 625 jeŭra, a rektar — 1835 jeŭra ŭ miesiac (ciapier 481 i 1410, adpaviedna).