Hruzija abvinavaciła Rasiju ŭ parušeńni svajoj pavietranaj prastory
Hruzinskija ŭłady zajavili, što rasijskija latalnyja aparaty parušyli pavietranuju prastoru Hruzii dva dni zapar — u sieradu i ŭ čaćvier.
Skrynšot ź videa rustavi2.com
U zajavie MZS Hruzii havorycca, što 9 śniežnia rasijski bieśpiłotnik, «jaki niezakonna bazujecca ŭ akupavanym rajonie Cchinvali», parušyŭ hruzinskuju pavietranuju prastoru i pralacieŭ nad pastami MUS Hruzii ŭ vakolicach horada Hory, u vioskach Koška i Huhucijantkary.
U čaćvier 10 śniežnia pavietranuju prastoru Hruzii parušyŭ rasijski vajenny viertalot MI-8, jaki, jak skazana ŭ toj ža zajavie hruzinskaha MZS, taksama «niezakonna bazujecca ŭ rehijonie Cchinvali».
Viertalot pralacieŭ nad budynkam, jaki naležyć hruzinskaj palicyi, u vioscy Miereci ŭ vakolicach Hory.
Infarmacyju ab mierkavanych parušeńniach hruzinskaj pavietranaj prastory rasijskimi latalnymi aparatami, jakija bazujucca na terytoryi akupavanaj Rasijaj Paŭdniovaj Asiecii, raspaŭsiudziła taksama ministerstva abarony Hruzii.
MZS Hruzii nazyvaje dziejańni rasijskaha boku pravakacyjnymi i parušajučymi asnovatvornyja normy i pryncypy mižnarodnaha prava.
U zajavie ŭtrymlivajecca zaklik da Rasii vykonvać uziatyja joju na siabie abaviazacielstvy, u tym liku tyja, jakija zafiksavanyja ŭ pahadnieńni ab spynieńni ahniu ad 12 žniŭnia 2008 hoda.
Telekanał «Rustavi-2» raźmiaściŭ na svaim sajcie videarolik, na jakim, jak śćviardžajecca, zaśniataje adno z parušeńniaŭ pavietranaj prastoru Hruzii rasiejskim bokam.