Bałahan u Kijevie: Avakaŭ špurnuŭ šklanku ŭ Saakašvili na pasiadžeńni ŭ Parašenki
Pamiž ministram unutranych spraŭ Ukrainy Arsienam Avakavym i kiraŭnikom Adeskaj abłdziaržadministracyi Michaiłam Saakašvili adbyłasia svarka na pasiadžeńni Nacrady reformaŭ u paniadziełak.
Pra heta paviedamiŭ deputat Błoka Piatra Parašenki Siarhiej Leščanka sa spasyłkaj na prysutnych na pasiadžeńni ŭdzielnikaŭ.
Zhodna ź infarmacyjaj, paśla taho, jak Saakašvili vystupiŭ z dakładam, Avakaŭ vykazaŭ da jaho pretenzii. «Pačałasia svarka, Avakaŭ abvinavaciŭ Saakašvili ŭ tym, što jon sam złodziej. Na što Saakašvili adkazaŭ, što ŭ jaho ničoha niama, akramia sumlennaha imia», — napisaŭ Leščanka ŭ svaim fejsbuku.
Padčas svarki, pavodle infarmacyi, ministr Avakaŭ pierajšoŭ na kryk sa słovami: «Preč z majoj krainy». «Vyjšaŭšy ź siabie, Avakaŭ kinuŭ šklankaj u Saakašvili», — adznačyŭ Leščanka.
«Premjer-ministr Jacaniuk abazvaŭ Saakašvili «hastraloram» i taksama paprasiŭ «zabiracca z Ukrainy», — dadaŭ palityk.
U adkaz na hetyja zajavy «Saakašvili skazaŭ, što jon taki ž hramadzianin, adnak, u adroźnieńnie ad Jacaniuka, nie rabavaŭ Ukrainy».
«Usio adbyłosia ŭ prysutnaści prezidenta Parašenki, jaki sprabavaŭ supakoić baki, a zatym zakryŭ pasiadžeńnie», — napisaŭ Leščanka.
Voś videa zajavy Saakašvili dla presy.
Ministr Avakaŭ apisaŭ padziei ŭ svaim fejsbuku inakš.
«Adeski hubiernatar sarvaŭsia ŭ isteryku i pačaŭ harłapanić na mianie: «Nichto nie maje prava tak razmaŭlać ź Michaiłam Saakašvili.. ty karumpavany ministr… a ja sumlenny čałaviek…», pierajšoŭ da adkrytych abraz.
Ja ŭstrymaŭsia ad taho, kab jaho stuknuć — plasnuŭ jamu ŭ tvar vadoj.
Ja daŭno nie bačyŭ nastolki ašyziełaha papulista. Nie davaŭ skazać ničoha — pierabivajučy ŭsich, uklučajučy prezidenta», — napisaŭ Avakaŭ.