19-hadovy syn rasijskaha miljardera zabiŭ ułasnuju maci
U Kazani rasśledujuć rezanansnuju kryminalnuju spravu, abvinavačanym pa jakoj prachodzić 19-hadovy Jahor Sosin, syn miljardera Ihara Sosina.
10 śniežnia kala paŭnočy ŭ adzin z palicejskich učastkaŭ Kazani źviarnulisia pracaŭniki piacizorkavaha haściničnaha kompleksu. Supracoŭniki hatela skardzilisia na nieadekvatnyja pavodziny adnaho z svaich pastajalcaŭ.
Pravaachoŭniki znajšli ŭ kalidory maładoha čałavieka. Jon byŭ u vidavočnym ałkaholnym abo narkatyčnym apjanieńni.
U numary debašyra palicejskija znajšli cieła 44-hadovaj žančyny, jaho maci. Na ciele zahinułaj — šmatlikija siniaki i ranki, śmierć nastupiła ŭ vyniku zadušvańnia. Pavodle papiarednich dadzienych, žančynu pazbavili žyćcia provadam ad zaradnaj pryłady.
U numary znajšli niekalki butelek z tabletkami. Usie preparaty adpraŭlenyja na ekśpiertyzu.
Anastasija Sosina, jak paviedamlajuć rasijskija vydańni, paśla razvodu z mužam-aliharcham zachapiłasia ezaterykaj i miedytatyŭnymi praktykami.
U stalicu Tatarstana jana pryjechała razam z synam Jahoram na sieminar «pa kompleksnym pahružeńni na novy ŭzrovień usprymańnia rečaisnaści». Syn śćviardžaje, što ŭ momant zabojstva jon znachodziŭsia pad uździejańniem mocnadziejnych preparataŭ, jakija dała jamu maci.
Jahor Sosin, padazravany: «Mama mnie davała tabletki niejkija. Dalej u hateli pačalisia niejkija niezrazumiełyja rečy, halucynacyi».
Jak źbivaŭ i dušyŭ rodnuju maci, Jahor nie pamiataje.
Pa zapisach z kamier videanazirańnia vyjaŭlena, što ŭ dzień zabojstva ŭ numar, akramia žančyny i jaje syna, nichto nie zachodziŭ.
U ciapierašni čas pa fakcie zabojstva raspačataja kryminalnaja sprava.
Siabry Jahora raspaviadajuć, što małady čałaviek ciažka pieražyvaŭ razvod baćkoŭ. Kali złavaŭsia, siabie nie kantralavaŭ. Vypusknik prestyžnaj łondanskaj biznes-škoły čaściakom učyniaŭ isteryki i razychodziŭsia va ŭsiu. Maci, u nadziei naładzić adnosiny, stała šukać adkazy ŭ nietradycyjnaj siamiejnaj psichaterapii.