Makiej: Pra Biełaruś u śviecie ciapier havorać tolki pazityŭna
«Za 20 ź nievialikim hadoŭ, jakija my pražyli jak samastojnaja, niezaležnaja dziaržava, my dasiahnuli vielmi mnohaha, Biełaruś stała viadomaj va ŭsim śviecie», — zajaviŭ ministr zamiežnych spraŭ Uładzimir Makiej 17 śniežnia ŭ Minsku na sustrečy byłych kiraŭnikoŭ biełaruskaha źniešniepalityčnaha viedamstva z nahody 95-hodździa stvareńnia Narodnaha kamisaryjata pa zamiežnych spravach.
Jak adznačyŭ kiraŭnik MZS, jaho niadaŭnija pieramovy ź jeŭrapiejskimi partniorami śviedčać ab tym, što ciapier Biełaruś nie asacyjujecca ŭ śviecie «z čymści niehatyŭnym». «Pra Biełaruś sapraŭdy siońnia havorać tolki pazityŭna. U pieršuju čarhu, viadoma, u suviazi z ukrainskim kryzisam, ale nie tolki», — skazaŭ Makiej.
U sustrečy ŭziali ŭdzieł byłyja kiraŭniki źniešniepalityčnaha viedamstva Biełarusi Piotr Kraŭčanka, Uładzimir Siańko, Ivan Antanovič, Urał Łatypaŭ, Michaił Chvastoŭ, Siarhiej Martynaŭ, syn pieršaha ministra zamiežnych spraŭ BSSR Kuźmy Kisialova Vasil Kisialoŭ, a taksama maładyja dypłamaty.
Makiej vykazaŭ padziaku kaleham za toje, što jany «zrabili dla krainy». Byłyja kiraŭniki MZS, u svaju čarhu, raskazali pra svoj vopyt pracy na hetaj pasadzie.