Jašče adno chobi: Łukašenka dvojčy na tydzień katajecca na viełatreku
Niadaŭna nam pakazali, jak padčas vizitu ŭ Turkmienistan Alaksandr Łukašenka abkatvaje viełatrek ŭ Ašchabadzie. Ale nazirać prezidenta na rovary ŭ apošni čas možna i doma, raspaviadajuć čytačy Tut,by. U «Minsk-Arenie» im davodziłasia hulać u badminton, kali prezident pobač kruciŭ piedali.
Alaksandr Łukašenka na viełatreku Alimpijskaha haradka, 11 śniežnia 2015. Fota: president.gov.by
Minčuk Jaŭhien rehularna chodzić na treniroŭki na viełatrek (jadro vydzielena pad zaniatki badmintonam i tenisam). Jakoje ž było jaho ździŭleńnie, kali ŭ adzin z budnych dzion jon asabista naziraŭ tam prezidenta.
Jašče na padychodzie da «Minsk-Arenie» maładoha čałavieka źbiantežyła vialikaja kolkaść supracoŭnikaŭ DAI. Na ŭvachodzie ŭ jaho dahledzieli sumku i nakiravali ŭ inšuju raspranalniu - nie ŭ tuju, što zvyčajna. Pa šlachu na korty achoŭnikaŭ jon nie naziraŭ - bačyŭ tolki mužčynu z navušnikam.
— Kali zajšoŭ na viełatrek, adrazu ž pačuŭ hučny hołas našaha prezidenta. Jon raiŭ svaim kaleham pa viełasporcie, kudy i jak pravilna jechać. Pobač z prezidentam było ahułam čałaviek 10.
Pa słovach Jaŭhiena, treniroŭka prachodziła ŭ zvyčajnym režymie. Ludziej z achovy było niašmat. U niejki momant na viełatreku źjaviŭsia syn prezidenta Mikałaj, ale na rovary jon nie kataŭsia.
Jak paźniej raspaviali Jaŭhienu treniery, pieryjad katańnia na rovary ŭ Łukašenki nadychodzić zimoj.
Svaimi ŭražańniami ab supolnych treniroŭkach z prezidentam padzialiłasia taksama minčanka Maryna. Zvyčajna dla zaniatkaŭ badmintonam treba papiarednie braniravać čas, raspaviadaje jana. U toj dzień, za hadzinu da vychadu, joj patelefanavali z administracyi «Minsk-Areny» i paprasili nie prychodzić, spasyłajučysia na toje, što chakiejny kłub vykupiŭ korty. Z pryncypu siamja Maryny vyrašyła nie admianiać treniroŭku.
Na ŭvachodzie ŭ budynak ich taksama čakaŭ nadhlad. Maryna pacikaviłasia ŭ inšych naviedvalnikaŭ, što adbyvajecca. Na što joj całkam spakojna adkazali, što prezident katajecca na rovary.
Zajšoŭšy ŭnutr, akramia Alaksandra Łukašenki subiasiednica nazirała ŭ zale jaho syna Mikałaja, jaki hulaŭ ź instruktaram ŭ badminton. Zvyčajnych naviedvalnikaŭ na vieładromie było razy ŭ 4 razy mienš, čym zvyčajna.
U Biełaruskaj fiederacyi viełasipiednaha sportu Tut.by paćvierdzili, što Alaksandr Łukašenka apošnim časam rehularna zajmajecca viełasportam. Pa słovach namieśnika staršyni Vitala Žmako, prezident imkniecca pryjazdžać na viełatrek 2 razy na tydzień.
Adrazu paśla zapusku viełatreka ŭ 2009 hodzie kiraŭnik dziaržavy zajmaŭsia ź viadomymi spartoŭcami - Natallaj Cylinskaj, Vasilom Kiryjenka. Zaraz, kali Łukašenka nabraŭsia dastatkova vopytu, jon addaje pieravahu treniravacca adzin abo z haściami, raspaviadaje pradstaŭnik fiederacyi.
— A vy sami katalisia z prezidentam? — pytajem.
— Pieršapačatkova taksama ź im kataŭsia, tak. Pa ŭzroŭni padrychtavanaści skažu tak — dobry. Kali b jon ź dziacinstva zajmaŭsia viełasportam, dumaju, jon byŭ by dobrym spartoŭcam.
Nahadajem, letaś Łukašenku rabili płanavuju apieracyju paśla spartyŭnaj traŭmy. Pres-sakratar prezidenta Natalla Ejsmant zapeŭniła, što siońnia prablem sa zdaroŭjem u kiraŭnika dziaržavy niama.