Štrafy za niezakonnuju vysiečku jełak — ad 900 tysiač da 54 młn rubloŭ
Dziaržaŭnaja lasnaja achova pierachodzić na ŭzmocnieny režym achovy lasoŭ dla niedapuščeńnia niezakonnych vysiečak chvojnych dreŭ, paviedamiła pres-słužba Ministerstva lasnoj haspadarki.
U lasach vystaŭlenyja pasty i na rehularnaj asnovie pravodziacca rejdy pa vyjaŭleńni parušalnikaŭ. Dla bolš efiektyŭnaj pracy rejdavyja mierapryjemstvy pravodziacca sumiesna z pradstaŭnikami Dziaržaŭnaj inśpiekcyi pa achovie žyviolnaha i raślinnaha śvietu pry prezidencie i supracoŭnikami Dziaržaŭtainśpiekcyi. Na aŭtadarohach vystaŭlena bolš za 300 kantrolnych pastoŭ. Asablivaja ŭvaha budzie nadavacca ŭčastkam lesu kala viosak, chvojnym maładniakam. Pradoŭžacca rejdavyja mierapryjemstvy ŭsie navahodnija śviaty.
Štrafy parušalnikam-fizasobam mohuć skłaści ad 5 da 50 bazavych vieličyń (ad 900 tysiač da 9 młn rubloŭ). Indyvidualnym pradprymalnikam u vypadku parušeńnia pryjdziecca vypłacić ad 20 da 200 bazavych vieličyń (ad 3 młn 600 tysiač da 36 młn rubloŭ), jurydyčnym asobam — ad 50 da 300 bazavych vieličyń (ad 9 młn da 54 młn rubloŭ).
Pavodle infarmacyi pres-słužby, u pieradnavahodni pieryjad minułaha hoda było vyjaŭlena 17 vypadkaŭ niezakonnych vysiečak chvojnych dreŭ, spahnana štrafaŭ na 2,5 młn rubloŭ.
Jak paviedamlałasia, z 22 śniežnia razhortvajecca pieradśviatočny handal navahodnimi drevami. Lashasy buduć realizavać jołki, chvoi, navahodnija bukiety, a taksama dekaratyŭnyja drevy ŭ kadkach. Nabyć drevy možna i ŭ laśnictvach, dzie ceny tradycyjna buduć mienšyja, čym na handlovych kropkach. Kantaktnyja telefony i adrasy lashasaŭ i laśnictvaŭ možna znajści praz sajt Ministerstva lasnoj haspadarki ŭ internecie abo niepasredna praz sajty lashasaŭ.