Rasija: Rasšyfravać dadzienyja «čornaj skryni» Su-24 niemahčyma
Pavietrana-kaśmičnyja siły Rasii zajaŭlajuć, što pračytać infarmacyju z bartavoha samapisca źbitaha ŭ rajonie turecka-siryjskaj miažy «Su-24M» pakul niemahčyma z-za ŭnutranych paškodžańniaŭ.
Hienierały Siarhiej Dronaŭ (źleva) i Siarhiej Bajnetaŭ vystupili na pres-kanfierencyi ŭ Maskvie 18 śniežnia; na ekranie — vyjava «čornaj skryni» źbitaha «Su-24». Fota AR
Jak paviedamiŭ namieśnik načalnika słužby biaśpieki palotaŭ avijacyi Uzbrojenych sił Rasii Siarhiej Bajnetaŭ, źniščanyja 13 z 16 mikraschiem «čornaj skryni», a astatnija paškodžanyja.
Pa słovach Bajnetava, kamisija pa rasśledavańni zdareńniaŭ prapracoŭvaje pytańnie ab pryciahnieńni śpiecyjalizavanych navukova-daśledčych ustanoŭ, jakija majuć mahčymaść sčytvać infarmacyju niepasredna z kryštala mikraschiem.
«Dla vykanańnia hetaj pracy, na žal, spatrebicca dastatkova praciahły čas. Budzie zroblena ŭsio mahčymaje dla jaje paśpiachovaha vykanańnia. Ab vynikach rasśledavańnia my budziem vas rehularna infarmavać», — skazaŭ Siarhiej Bajnetaŭ.
U piatnicu namieśnik hałoŭnakamandujučaha Pavietrana-kaśmičnych sił Rasii Siarhiej Dronaŭ paviedamiŭ, što nazapašvalnik infarmacyi źbitaha tureckimi VPS rasijskaha bambavika maje paškodžańni, śpisańnie zarehistravanaj palotnaj infarmacyi budzie pravodzicca z vykarystańniem śpiecyjalnaj aparatury. Čakałasia, što vyniki rasšyfroŭki buduć prezientavanyja 21 śniežnia.
U rasśledavańni hibieli bambavika Su-24M, źbitaha źniščalnikam VPS Turcyi 24 listapada, raniej pahadzilisia ŭdzielničać śpiecyjalisty z Kitaja i Brytanii.
Hałoŭnaja meta — paćvierdzić abo abvierhnuć śćviardžeńni Minabarony RF, što samalot nie parušaŭ pavietranuju prastoru Turcyi.