Ukrainskija tanki zapraviacca mazyrskaj salarkaj ad małaviadomaj firmy
Jak paviedamlajuć ukrainskija ŚMI, bujny kantrakt Minabarony Ukrainy, padpisany ŭ śniežni hetaha hoda, vyjhraŭ novy pastaŭščyk mazyrskaha dyzpaliva.
Heta raniej nieviadomaja firma «Mieta ojł», zarehistravanaja letam hetaha hoda ŭ Dnieprapiatroŭsku sa statutnym kapitałam 1 tys. hryŭniaŭ (43 dalary). Uładalnikam jaje ličycca zusim nieviadomaja da hetaha času na paliŭnym rynku Ukrainy Volha Žukava.
Jak piša ŭkrainskaje vydańnie «Naši hroši», Minabarony na tarhach na elektronnaj placoŭcy zakupiła ŭ hetaj kampanii 5601 ton dyzielnaha paliva na sumu 95 młn 370 tys. hryŭniaŭ (4,1 młn dalaraŭ). «Mieta ojł» prapanavała dyzpaliva Mazyrskaha NPZ, vyrablenaje 20 studzienia 2015 h., i atrymała pieramohu nad vaśmiu inšymi pretendentami. ŚMI akcentujuć uvahu, što termin vykarystańnia hetaj partyi minaje praź miesiac. Niekatoryja inšyja ŭdzielniki tarhoŭ taksama prapanoŭvali biełaruskaje paliva.
Jak užo pisaŭ «Ježiednievnik», u kancy 2015 uładalniki biełaruskaha resursu paśla paŭhoda ŭpartaj baraćby za ŭkrainski rynak dyzpaliva vycisnuli ź jaho rasijski pradukt.
Kali pastaŭki dyzpaliva ź Biełarusi na praciahu 2015 u siarednim składali kala 150 tys. ton, to ŭ listapadzie va Ukrainu było adhružana 272 tys. ton. Impart paliva ź Litvy skłaŭ 92 tys. ton, Polščy — 24 tys. ton, a z Rasii ŭsiaho 19 tys. ton.
Taki rezki rost abjomaŭ pastavak dyzpaliva ź Biełarusi ŭdzielniki rynka tłumačać u tym liku novaj schiemaj, na jakuju va ŭmovach embarha pajšli pastaŭščyki z Rasii. Z pačatku kastryčnika pastaŭki rasijskaha dyzpaliva va Ukrainu pajšli na źmianšeńnie z-za embarha, uviedzienaha Fiederalnaj słužbaj pa techničnym i ekspartnym kantroli Rasii. Hetaja słužba ciapier vydaje dazvoły na ŭvoz na terytoryju Ukrainy tolki ŭ tym vypadku, kali ŭkrainskija kontrahienty padaduć rasijskim eksparcioram daviedki, što dyzpaliva, aliva, butan i inš. nie buduć vykarystoŭvacca ŭ vajennych metach.
Paśla ŭviadzieńnia zabarony vyrablenaje na rasijskich NPZ paliva pačało siertyfikavacca ŭ Biełarusi jak PDE (paliva dyzielnaje ekspartnaje) i adhružacca va Ukrainu jak biełaruski pradukt praź biełaruskija kampanii. U liku pasiarednikaŭ nazyvajucca «Interservis» (uładalniki Alaksandr Šakucin i Mikoła Vierabiej) i «Enierha-ojł» (Alaksiej Aleksin).