Z hatela ŭ Burkina-Faso vyzvalenyja bolš za 100 zakładnikaŭ
U stalicy Burkina-Faso Uahaduhu zaviaršyłasia śpiecapieracyja pa vyzvaleńni zakładnikaŭ z zachoplenaha isłamistami hatela Splendid, u jakim časta sielacca pradstaŭniki zachodnich krain.
126 čałaviek vyzvalenyja. Prynamsi 22 čałavieki zahinuli. Dadzienych ab nacyjanalnaj prynaležnaści zahinułych i paciarpiełych pakul niama.
Jak paviedamlajuć u ministerstvie biaśpieki zachodnieafrykanskaj krainy, troje bajevikoŭ zabityja.
«Siarod ich adzin arab i dvoje afrykancaŭ», - cytuje Rejter ministra biaśpieki Simona Kampaare.
U šturmie hatela ŭ stalicy ŭdzielničali vajskoŭcy Burkina-Faso pry padtrymcy francuzskich śpiecsłužbaŭ.
Pastupaje niepravieranaja infarmacyja ab tym, što bajeviki mahli napaści na hatel, jaki znachodzicca niepadalok.
Prezident Francyi Fransua Aland nazvaŭ «ahidnym» napad na hatel u byłoj francuzskaj kałonii.
Adkaznaść za napad ŭziała na siabie źviazanaja z «Al-Kaidaj» hrupoŭka «Al-Kaida ŭ krainach isłamskaha Mahryba».
4-zorkavy hatel Splendid, u jakim žyvuć supracoŭniki AAN i spyniajucca turysty z zachodnich krain, napali pozna ŭviečary ŭ piatnicu.
Pa słovach vidavočcaŭ, spačatku pobač padarvalisia dva aŭtamabili, zatym hrupa ŭzbrojenych ludziej u maskach atakavała budynak i zachapiła jaho, niahledziačy na ŭzbrojeny supraciŭ achovy.
Napadniki taksama ŭvarvalisia ŭ papularnaje siarod zamiežnikaŭ kafe Cappuccino, i, jak skazaŭ adzin z aficyjantaŭ, zastrelili tam niekalki čałaviek.