Mitrapalit Pavieł aśviaciŭ vadu ŭ Śviata-Duchavym kafiedralnym sabory Minska
Mitrapalit Minski i Zasłaŭski Pavieł, Patryjaršy Ekzarch usiaje Biełarusi ŭ Vadochryščanskuju kućciu pravioŭ Vialikuju viačerniu, Boskuju liturhiju i Vialikaje aśviačeńnie vady ŭ minskim Śviata-Duchavym kafiedralnym sabory, paviedamlaje aficyjny partał Biełaruskaj pravasłaŭnaj carkvy.
Pradstajacielu BPC sasłužyli kliryki sabora. Propaviedź pierad pryčaściu pramoviŭ kliryk Śviata-Duchava kafiedralnaha sabora archimandryt Aleksij (Šynkievič).
Paśla zaviaršeńnia bohasłužeńnia Patryjaršy Ekzarch źviarnuŭsia da duchavienstva i viernikaŭ sa słovami nastaŭleńnia.
Mitrapalit Pavieł pavinšavaŭ usich z pryniaćciem Śviatych Chrystovych Tajn i daŭ usim archipastyrskaje błahasłavieńnie.
Vialikaje vodaaśviačeńnie pravodzicca dva razy — u sam dzień Bohajaŭleńnia i napiaredadni, u naviačerje Bohajaŭleńnia (Vadochryščanskaja kućcia). Niekatoryja vierniki ličać, što vada, aśviečanaja ŭ hetyja dni, roznaja. Ale na samaj spravie na kućciu i ŭ dzień śviata Vadochryšča pry jaje aśviačeńni ŭžyvajecca adzin čyn.
Vadochryščanskaja vada — heta śviatynia, doma jaje bieražliva zachoŭvajuć u śviatym kucie kala abrazoŭ. Akramia jaje pravasłaŭnyja časta vykarystoŭvajuć vadu, aśviačonuju na malebnach (małoje vodaaśviačeńnie), jakija słužać na praciahu ŭsiaho hoda. Śviatuju vadochryščanskuju vadu pryniata ŭžyvać našča razam z prośviraj paśla ranišniaha malitviennaha praviła z asablivaj hłybokaj pašanaj.
Na Vadochryšča ŭ pravasłaŭnych pryniata akunacca ŭ pałonku. Adnak isnujučaja tradycyja kupańnia ŭ chałodnych pałonkach, jak śćviardžajuć śviaščennasłužycieli, nie maje niepasrednaha dačynieńnia da samoha śviata, nie źjaŭlajecca abaviazkovaj i nie ačyščaje ad hrachoŭ.