Zatrymali kiraŭnika TAA «Futbolny kłub «Skvič» pa spravie ab kradziažy 14 młrd rubloŭ
Zatrymany kiraŭnik minskaha TAA «Futbolny kłub SKVIČ» Viktar Paŭłaŭ. Jon prachodzić pa kryminalnaj spravie ab kradziažy 14 miljardaŭ rubloŭ. Pra heta paviedamlaje partał tut.by, jaki spasyłajecca na aficyjnuju pradstaŭnicu Śledčaha kamiteta Juliju Hančarovu.
Biźniesmien Paŭłaŭ padazrajecca ŭ tym, što na praciahu čatyroch hadoŭ vykarystoŭvaŭ hrošy dolščykaŭ žyłoha doma ŭ mikrarajonie Kamiennaja Horka (na skryžavańni vulic Niomanskaja i Nalibockaja) na haspadarčyja patreby, nie źviazanyja ź jaho pabudovaj.
Jašče ŭ kancy 2015-ha była raspačataja kryminalnaja sprava. Śledčyja vyśvietlili, što z-za dziejańniaŭ kiraŭnika FK SKVIČ byli istotna zaciahnutyja terminy budaŭnictva. Pavodle rašeńnia dziaržorhanaŭ, da pracaŭ na abjekcie pryciahnuli novyja padradnyja arhanizacyi. Im SKVIČ jašče pavinien 70 miljardaŭ rubloŭ.
Adznačajecca, što ŭpraŭlajučy FK SKVIČ, niahledziačy na niezdavalniajučyja vyniki finansava-haspadarčaj dziejnaści kampanii, atrymlivaŭ uznaharodžańni — ahułam bolš za 1 młrd rubloŭ. Akramia taho, jon atrymaŭ, «u jakaści ŭznaharodžańnia», try žyłyja pamiaškańni ŭ pabudavanym šmatkvaternym domie.
Rasśledavańnie pa spravie Viktara Paŭłava pravodzić Upraŭleńnie Śledčaha kamiteta pa h. Minsku.
Nahadajem, futbolny kłub SKVIČ byŭ zasnavany biźniesmienam Paŭłavym u 2000 hodzie. Jon vystupaŭ i ŭ vyšejšaj lizie, u apošnija hady hulaje ŭ druhoj lizie čempijanatu Biełarusi.