U Vilni pačaŭsia sud pa spravie ab kryvavych padziejach studzienia 1991 hoda
U Vilenskim akruhovym sudzie pačalisia słuchańni pa spravie ab studzieńskich padziejach 1991 hoda ŭ Litvie, abvinavačanymi pa jakim prachodziać byłyja savieckija vajskoŭcy, čynoŭniki, supracoŭniki KDB i MUS, ciapier hramadzianie Rasii.
Savieckija tanki na vulicach Vilni. fota vilnews.com
Pavodle dadzienych boku abvinavačańnia, 13 studzienia 1991 hoda pry sprobie šturmu savieckimi vajskoŭcami televiežy i budynka radyjotelecentra ŭ Vilni zahinuli 14 čałaviek, bolš za tysiaču atrymali ranieńni, u tym liku 31 čałaviek — ciažkija.
Paciarpiełymi pa spravie pryznanyja kala 500 čałaviek, abvinavačanymi — 65, ale na łavie padsudnych tolki dvoje — hramadzianie Rasii Juryj Miel i Hienadź Ivanoŭ.
Astatnija abvinavačanyja, u tym liku eks-ministr abarony SSSR Dźmitryj Jazaŭ, načalnik Vilenskaha harnizona savieckaj armii Alaksandr Uschopčyk, były aficer KDB Michaił Hałavataŭ, byłyja partyjnyja funkcyjaniery Uładzisłaŭ Švied i Alhimantas Naŭdžunas žyvuć za miažoj — jak miarkujecca, u Rasii.
Za čas słuchańniaŭ sudu treba apytać kala tysiačy śviedak.
Padsudnych, jakich vinavaciać u ździajśnieńni vajennych złačynstvaŭ i złačynstvaŭ suprać čałaviečnaści ŭ suviazi z razhonam ruchu za niezaležnaść Litvy, abaraniajuć kala 60 advakataŭ.
Abaroncy vilenskaha telecentra sprabujuć spynić saviecki tank. Pad husienicy trapiła adna ź mitynhoŭcaŭ. Fota vilnews.com
Prakuratura adznačaje, što na hetyja złačynstvy nie raspaŭsiudžvajecca termin daŭnaści.
Paśla vykanańnia nieabchodnych farmalnaściaŭ boku pracesu damovilisia ab pačatku słuchańniaŭ pa sutnaści 29 studzienia.