Biełarus, jaki zaklučyŭ u Niderłandach šlub ź litoŭcam, nie atrymaŭ dazvołu na žycharstva ŭ Litvie
Departamient mihracyi Litvy nie daŭ dazvołu na pražyvańnie ŭ Litvie biełarusu, jaki zaklučyŭ šlub u Hałandyi z hramadzianinam Litvy.
Hetuju infarmacyju ŭ čaćvier paćvierdziła ahienctvu BNS ministerstva ŭnutranych spraŭ Litvy.
«Rašeńnie admović u vydačy dazvołu na časovaje žycharstva ŭ Litvie pryniataje na toj padstavie, jakaja paznačanaja ŭ zajavie», — zajaviŭ daradca ministra ŭnutranych spraŭ Tomas Biaržynskas.
Heta rašeńnie Departamienta mihracyi moža być abskardžana na praciahu 14 dzion u Vilenskim akruhovym administracyjnym sudzie.
Časovaja kiraŭnik departamienta Evielina Hudzinskajcie patłumačyła, što rašeńnie pryniata z ulikam pazicyi, pradstaŭlenaj MUS.
«Pakolki heta pieršy padobny vypadak, stvarajecca precedent, my zapytali mierkavańnie MUS, bo heta ŭstanova, jakaja farmuje palityku ŭ śfiery mihracyi. MUS pradstaviła mierkavańnie, zhodna ź jakim, pakolki ŭ Litvie nie mohuć zaklučacca adnapołyja šluby, to pa sutnaści taki šlub nie moža pryznavacca ŭ Litvie», — patłumačyła Hudzinskajcie. Jana adznačyła, što ministerstva abhruntavała svajo rašeńnie hramadskim intaresam, a departamient nie asprečvaŭ pazicyju ministerstva.
Jak śćviardžaje partał navin lrytas.lt, hetaja homaseksualnaja para zaklučyła šlub u Niderłandach.
Pavodle zakonu ab pravavym stanoviščy zamiežnikaŭ, adnoj z padstaŭ dla atrymańnia časovaha žycharstva ŭ Litvie źjaŭlajucca vypadki złučeńnia siemjaŭ. Zakon vyznačaje, što členami siamji hramadzianina dziaržavy ES ličacca muž/žonka abo asoba, ź jakoj zaklučany rehistravany dahavor ab partniorskich adnosinach, dzieci. Litoŭskija zakony dazvalajuć zaklučać šluby tolki z partniorami supraćlehłaha połu.
Apublikavanyja ŭ kastryčniku 2015 hoda vyniki apytańnia pakazali, što žychary Litvy ŭ najbolšaj stupieni siarod usich žycharoŭ ES nie chacieli b pracavać z supracoŭnikam-homaseksuałam i bolš za ŭsich žycharoŭ ES byli b niezadavolenyja, kali b ich dzicia zaviazała homaseksualnyja suviazi.