Turcyja znoŭ abvinavaciła Rasiju ŭ parušeńni svajoj pavietranaj prastory
Ułady Turcyi abviaścili, što ŭ piatnicu rasijski źniščalnik-bambardziroŭščyk Su-34 parušyŭ tureckuju pavietranuju prastoru, i vykazali abureńnie takimi «biezadkaznymi pavodzinami».
«Su-34, jaki naležyć VPS Rasijskaj Fiederacyi, parušyŭ pavietranuju prastoru Turcyi ŭ 11:46 pa miascovym časie ŭčora (u piatnicu)», — havorycca ŭ aficyjnaj zajavie tureckaha ministerstva zamiežnych spraŭ.
Zhodna z tureckim MZS, ekipaž Su-34 nie reahavaŭ na papiaredžańni na ruskaj i anhlijskaj movach.
U suviazi z hetym incydentam MZS Turcyi vyklikała rasijskaha pasła «dla vykazvańnia pratestu i abureńnia».
U zajavie tureckaha ministerstva skazana, što heta parušeńnie źjaŭlajecca vyraznym sihnałam taho, što Rasija choča ŭskładnić i biez taho niaprostyja adnosiny pamiž dźviuma krainami.
Adnosiny pamiž Rasijaj i Turcyjaj abvastrylisia paśla taho, jak u kancy listapada tureckija VPS źbili rasijski bambavik Su-24 na turecka-siryjskaj miažy. Turecki bok patłumačyŭ heta tym, što jon uvarvaŭsia ŭ jaje pavietranuju prastoru. Rasijskija ŭłady heta admaŭlajuć; prezident Uładzimir Pucin nazvaŭ hibiel samalota «udaram u śpinu».
Rasija ŭ adkaz ŭviała embarha na impart tureckich tavaraŭ — hałoŭnym čynam praduktaŭ charčavańnia, a taksama zabaraniła prodaž turystyčnych puciovak u Turcyju i ŭviała vizy dla hramadzian hetaj krainy.