Milinkievič: Budaŭnictva AES u Biełarusi niedapuščalna
Lider Ruchu «Za svabodu» raspaŭsiudziŭ zvarot z nahody čarhovych uhodak Čarnobylskaj katastrofy.
Samaja bujnaja technahiennaja katastrofa XX—ha stahodździa zahubiła tysiačy ludziej i naniesła niepapraŭnuju škodu zdaroŭju biełarusaŭ, ukraincaŭ i rasiejcaŭ. Piataja častka našaj lepšaj terytoryi zabrudžana radyjacyjaj i na stahodździ stała niebiaśpiečnaj dla ludziej.
26 krasavika — heta Dzień smutku biełaruskaha naroda.
Dahetul my nie viedajem usioj praŭdy: kolki čarnobylcaŭ pamierła, a kolki paciarpieła ad radyjacyi. Prafiesar Bandažeŭski, jaki stajaŭ za toje, kab ludzi viedali praŭdu pra Čarnobyl, byŭ spačatku asudžany, a potym zmušany źjechać z krainy.
Jak u savieckija časy, ludzi nie majuć siońnia dostupu da važnaj infarmacyi, jakaja źviazana z hałoŭnym — biaśpiekaj ich žyćcia i zdaroŭja. Bolš za toje, ich pačali padmanvać, śćviardžajučy, što zabrudžanyja radyjacyjaj terytoryi možna vykarystoŭvać ŭ sielskaj haspadarcy. Pry hetym biełaruskija standarty čyścini pradukcyi na paradki nižej za ahulnajeŭrapiejskija.
Treba spynić padobnuju złačynnuju praktyku. My nie chočam, kab dzieci našych dziaciej adčuli Čarnobyl i na svaim zdaroŭje. Palityka ŭłady, jakaja nie kłapocicca pra zdaroŭje svaich hramadzian — antynarodnaja i amaralnaja. Amaralnym jość rašeńnie ŭradu, jaki pazbaŭlaje ilhotaŭ pierasialencaŭ, invalidaŭ i likvidataraŭ katastrofy na ČAES.
26 krasavika — heta i Dzień napaminu pra niebiaśpieku «mirnaha atama».
Atam zaŭsiody niebiaśpiečny dla zdaroŭja čałavieka i navakolnaha asiarodździa asabliva ŭ niedemakratyčnych dziaržavach, dzie niama prazrystaści i dostupu da praŭdzivaj infarmacyi.
Rašeńnie pra budaŭnictva AES ŭ Biełarusi biez abnarodavanaj navukovaj ekśpiertyzy i biez hramadskaj dyskusii niasie pahrozu dla biełarusaŭ i dla našych susiedziaŭ. Zaklikaju ŭsich suhramadzianaŭ vyjści ŭ hety dzień na Čarnobylski Šlach, kab skazać:
NIE admienie sacyjalnych harantyjaŭ paciarpiełym ad katastrofy na ČAES!
NIE budaŭnictvu AES!
NIE zakrytaści infarmacyi pra ŭpłyŭ radyjacyi na čałavieka i pryrodu!
NIE sielhasvytvorčaści na zabrudžanych ziemlach!