Žurnalist Pavieł Dabravolski abskardziŭ nakładzieny na jaho štraf
Žurnalist partała tut.by Pavieł Dabravolski, źbity padčas sudovaha pracesu pa «spravie hraficistaŭ», padaŭ u Minski haradski sud skarhu na rašeńnie suda Frunzienskaha rajona stalicy, jaki aštrafavaŭ jaho na 9,45 młn. rubloŭ. «Učora my ź jurystami padrychtavali abskardžańnie, i siońnia ja advioz jaho ŭ Minski haradski sud», — paviedamiŭ Dabravolski BiełaPAN 4 lutaha.
Napiaredadni žurnalist atrymaŭ matyvavalnuju častku rašeńnia, zhodna ź jakim sud aštrafavaŭ jaho za drobnaje chulihanstva, u pryvatnaści niecenzurnuju łajanku, i niepadparadkavańnie zakonnym patrabavańniam słužbovaj asoby. U dakumiencie fihurujuć pakazańni śviedak — supracoŭnikaŭ AMAP, jakija zajavili ŭ sudzie, što Dabravolski na ich «navalvaŭsia zzadu, chapaŭ za kaŭnier i ciahnuŭ nazad».
Hetyja pakazańni, pavodle słoŭ žurnalista, «samaja vialikaja niestykoŭka ŭ spravie». Ź ich vynikaje, što abvinavačvany zdoleŭ adnoj rukoj utrymać adrazu dvuch milicyjanieraŭ. «Heta značyć, adnoj rukoj ja zdymaŭ videa, a druhoj — schapiŭ za kaŭnier i paciahnuŭ na siabie adrazu dvuch amapaŭcaŭ», — rastłumačyŭ Dabravolski.
«Heta absurdnaje abvinavačańnie, i ja nie razumieju, jak sud moh tak lohka vypisać štraf. Jana (sudździa Maryja Jarochina) vysłuchała tolki dvuch śviedkaŭ-amapaŭcaŭ, choć u tym pakoi sa mnoj byli Pavieł Siarhiej i Maksim Šycik, jakija ŭsio niepasredna bačyli. Ich, viadoma ž, nie apytvali, apytali tolki zacikaŭleny bok», — skazaŭ žurnalist. Jon raźličvaje na toje, što vyjaŭlenyja niedakładnaści dapamohuć jamu abaranić svaju praŭdu ŭ Minharsudzie.