Labiedźka i Jaskievič aštrafavanyja na 50 i 25 bazavych vieličyń za studzieńskuju akcyju ŭ padtrymku ipešnikaŭ
Sud Maskoŭskaha rajona Minska 17 lutaha aštrafavaŭ staršyniu Ab`iadnanaj hramadzianskaj partyi (AHP) Anatola Labiedźku i aktyvistku pradprymalnickaha ruchu ź Viciebska Irynu Jaskievič na 50 i 25 bazavych vieličyń adpaviedna (10,5 i 5,25 młn. rubloŭ).
Labiedźku i Jaskievič sudzili za parušeńnie paradku arhanizacyi abo praviadzieńnia masavaha mierapryjemstva (art. 23.34 KoAP). Havorka idzie pra akcyju ŭ padtrymku indyvidualnych pradprymalnikaŭ, jakaja prajšła na płoščy Niezaležnaści ŭ Minsku 18 studzienia.
Akramia taho, jak paviedamiŭ Labiedźka, siońnia pry adsutnaści abvinavačvanych rašeńni ab nakładańni štrafaŭ byli vyniesienyja ŭ dačynieńni da hramadskaj aktyvistki, 67-hadovaj piensijanierki ź Minska Niny Bahinskaj (30 bazavych vieličyń) i aktyvista Artura Adamiana (25 b.v.).
Pa vynikach akcyi ŭ padtrymku IP va ŭrad byli pieradadzieny dva zvaroty z prapanovami pa vyrašeńni prablem małoha biźniesu. Adna z prapanoŭ praduhledžvała admienu ŭkaza prezidenta № 222 «Ab rehulavańni pradprymalnickaj dziejnaści i realizacyi tavaraŭ indyvidualnymi pradprymalnikami i inšymi fizičnymi asobami», z-za składanaściaŭ z vykanańniem normaŭ jakoha mnohija IP prypynili pracu z 1 studzienia.
Heta ŭžo druhi za apošnija dva dni sud nad Labiedźkam. 16 studzienia sud Leninskaha rajona Minska aštrafavaŭ palityka na 50 bazavych vieličyń za pikiet suprać milicejskaha samavolstva, jaki prajšoŭ 30 studzienia kala budynka Viarchoŭnaha suda.