Zakidajem šapkami? Pa raschodach na armiju Biełaruś zajmaje apošniaje miesca ŭ rehijonie INFAHRAFIKI
Ekśpierty ŭsio čaściej vykazvajuć niepakoj stanam biełaruskaj armii. Jaje technika, asabliva avijacyja i srodki supraćpavietranaj abarony, sastareli. A finansavaje i materyjalnaje zabieśpiačeńnie asabovaha składu takoje, što prestyž słužby zastajecca nievysoki.
Miž tym zachop Rasijaj Kryma i Uschodniaha Danbasa vyklikaŭ tryvohu va ŭsim rehijonie. Susiedzi adreahavali na dziejańni Rasii aktyvizacyjaj mižnarodnaha supracoŭnictva ŭ śfiery abarony, pavieličeńniem i pieraŭzbrajeńniem armij, a taksama rostam vajskovych biudžetaŭ. Jak vyhladaje Biełaruś pa finansavańni armii ŭ paraŭnańni z susiedziami?
Nasupierak papulisckim stereatypam, vydatki na armiju ŭ Biełarusi zastajucca krytyčna nizkija. Estonija sa svaimi 1,3 młn nasielnictva vydatkoŭvaje na svaich vajskoŭcaŭ amal stolki ž, kolki 9-miljonnaja Biełaruś.
Heta stanovicca asabliva vyjaŭna, kali my paraŭnoŭvajem vydatki ŭ pieraliku na dušu nasielnictva. U naminalnym vyražeńni mienš na armiju ŭ 2015 hodzie vydatkoŭvała tolki Ukraina.
A kali pieraličyć vydatki na dušu nasielnictva pa parytecie pakupnoj zdolnaści, to Biełaruś uvohule apuskajecca na apošniaje miesca ŭ rehijonie.
Staraja prykazka kaža, što toj, chto nie kormić svaju armiju, budzie karmić čužuju.
Najnoŭšaja niamieckaja SAU Panzerhaubitze 2000, partyju jakich kuplaje Litva. Fota janes.com.
Litva ŭ 2015 hodzie pavialičyła vydatki na abaronu bolš čym na 30%. Nieparaŭnalna ź inšymi artykułami dziaržaŭnaha biudžetu vyraśli vajskovyja vydatki ŭ Estonii i Łatvii.
Samy paŭnočny susied Rasii Narviehija pavialičyła vajenny biudžet na hety hod na 9,8% navat na fonie padajučych koštaŭ na naftu, jakoje adčuvalna ŭdaryła pa ekanomicy krainy.
Narviežskija žaŭniery. Fota armyrecognition.com.
Kala $1,51 młrd narviežcy addajuć u hetym hodzie tolki na zakup novaj zbroi.
Taksama Narviehija płanuje pavialičyć siły svajoj arktyčnaj hrupoŭki, jakaja staić niepasredna na miažy z RF.
Niejtralnaja Finlandyja, jakaja płanuje ŭsio bolš aktyŭna supracoŭničać z NATA, taksama nie zabyvaje pra ŭłasnyja vytraty na abaronu.
Haračyja finskija chłopcy. Fota pinimg.com.
Kali ŭ 2015 hodzie abaronny biudžet Suomi składaŭ kala 2,7 młrd jeŭra, to ŭ 2016 hodzie płanujecca addać na vajennyja mety amal 2,9 młrd.
Pa zrazumiełych pryčynach praciahvaje rezka padvyšać vajennyja vydatki Ukraina. Kali ŭ 2015 hodzie jana ŭžo mieła samy vysoki za historyju niezaležnaści abaronny biudžet — kala $2,2 młrd, to ŭ 2016 jon moža pieravysić adznaku $3 młrd.
Tureckija źniščalniki F16. Fota veteranstoday.com.
Turcyja, jakaja ŭ kancy 2015 hoda stała adnym z zaciatych praciŭnikaŭ RF, padvysiła ahulny biudžet na abaronu i biaśpieku na 20% u 2016 hodzie ŭ nacyjanalnaj valucie, adnak z-za devalvacyi nacyjanalnaj valuty ŭ dalaravym ekvivalencie pakazčyk navat trochi źmienšycca (kala $20 młrd). Tym nie mienš, heta adziny z susiedziaŭ Rasii, vajskovy biudžet jakoha možna ličyć suvymiernym z rasijskim.
Rasijskija šturmavyja hrupy biez znakaŭ adroźnieńnia pačali zachop Kryma z aeraportaŭ i budynkaŭ parłamienta i ŭrada, 2014 hod. Fota waystoday.com.
Padzieńnie ekanomiki Rasii pryviało da taho, što, choć u rasijskich rublach biudžet armii vyras na 0,8% da 3,145 trłn, adnak u dalarach rezka skaraciŭsia — prykładna da $26 młrd. Da taho ž, ciapier urad razhladaje mahčymaść skaracić vajennyja vydatki na 5%.
Biełaruski ž vajskovy biudžet niekalki hadoŭ trymaŭsia na ŭzroŭni $700—$800 miljonaŭ, što prykładna ŭ 10 razoŭ mienš, čym u susiedniaj Polščy. U 2015 hodzie situacyja stała jašče horšaj. Na abaronu było nakiravana kala 8,8 tryljona rubloŭ. Ale ŭ vyniku devalvacyi nacyjanalnaj valuty vytraty na armiju ŭ pieraliku pa siaredniehadovym kursie skaracilisia da $554 młn.
Biełarusi treba mocnaja armija. A kab armija była mocnaj, vytraty na jaje treba pavialičvać. Zabieśpiačeńnie dastatkovaha finansavańnia armii pavinna stać adnoj z metaŭ reformaŭ u biełaruskaj ekanomicy.