Rasijski navukoviec znajšoŭ u «Zornych vojnach» zapazyčańni z «Kaščeja Nieśmiarotnaha»
Małady navukoviec z Rasii Jaŭhien Hranin, jaki pracuje ŭ Tomskim dziaržuniviersitecie sistem kiravańnia i radyjoelektroniki, zajaviŭ, što pieršy epizod filma «Zornyja vojny» Džordža Łukasa (1977) na 96% kapijuje savieckuju karcinu «Kaščej Bieśśmiarotny» Alaksandra Roŭ (1944).
kino-teatr.ru
Daśledavańnie aśpirant pravioŭ z dapamohaj admysłovaj prahramy antypłahijatu, raspracavanaj navukoŭcami univiersiteta.
Havorka idzie pra zapazyčańni siužetu i piersanažaŭ. Jaŭhien Hranin adznačyŭ, što ŭ šmatlikich piersanažaŭ filmaŭ padobnyja sacyjalnyja roli, sacyjalnaje ŭzajemadziejańnie, a taksama źviarnuŭ uvahu na raźvićcio sacyjalnaha asiarodździa dvuch tvoraŭ. Takim čynam, aśpirant pryjšoŭ da vysnovy, što stvaralniki «Zornych vojnaŭ» unieśli minimalny ŭkład u raspracoŭku aryhinalnych linij siužetu fantastyčnaj kinaepapiei. Navukoviec pryvioŭ padabienstva Luka Skajuokiera i Mikity Kažamiaki, ich kachanych Lei Arhany i Marji Mareŭny, jakich spačatku vykradajuć, a zatym vyzvalajuć, mahistra Jody i Dziadka-sam-z-palec-barada-siem-viorst, jaki pieradaje hałoŭnamu hieroju siłu.
hero.wikia.com
Mnohija kalehi Jaŭhiena Hranina adznačyli, što z dapamohaj jaho prahramy možna paraŭnoŭvać nie farmuloŭki fraz, a mienavita padabienstva piersanažaŭ i asobnych siužetnych linij. Tamu bolš pravilna skazać, što havorka idzie nie pra płahijat, a pra zapazyčańni i supadzieńni.