Partyi Litvy damovilisia pasłać sihnał Zachadu pra pahrozu Astravieckaj AES
Litoŭskija palityki hatovyja nakiravać sihnał Zachadu ab tym, što patok elektraenierhii, z Astravieckaj AES, budzie abmiažoŭvacca — bujnyja partyi krainy padrychtujuć pahadnieńnie pra pahrozu, jakuju ŭjaŭlaje hetaja stancyja dla Litvy.
Fota Hiermana Sačuka, Tut.by
Takoje rašeńnie ŭ paniadziełak było pryniata na naradzie usich palitykaŭ parłamienckich partyj i enierhietykaŭ u sojmie. Adnak, mierkavańni kirujučych partyj i apazicyi pa tonie pahadnieńnia razyšlisia — kansiervatary prapanujuć Litvie być žorstkaj, a kirujučyja sacyjał-demakraty i pradstaŭniki partyi «Paradak i spraviadlivaść» (PS), ličać, što heta karyści nie pryniasie.
My pavinny nakiravać zusim jasny sihnał ab tym, što abmiežavańnie i fizičnych, i kamiercyjnych patokaŭ budzie vielmi strohim. Što napramuju zaležyć ad nas — heta mahčymaść prademanstravać biełarusam, «Rasatamu» (rasijskaj karparacyi, jakaja buduje Astravieckuju AES) i Pucinu, što ekanamičny płan hetaj elektrastancyi moža być zusim nie takim, jak jany padličvali - što my zrobim usio, kab elektraenierhija nie patrapiła ŭ litoŭskuju sistemu, kab joj nie handlavali, i kab jana nie prynosiła valutu «, - zajaviŭ lidar parłamienckaj apazicyi, kansiervatar Andrus Kubilus.
Lidar partyi kansiervataraŭ, jeŭraparłamientaryj Habryelus Łandśbierhis pierakanany, što Litva moža dapamahčy spynić finansavańnie Astravieckaj AES. «Siońnia vychad na finansavyja rynki dla Rasii vielmi składanyja, kredyty vielmi i vielmi darahija. Heta značyć, što luboje ŭzrušeńnie, ci pavyšeńnie ryzyki prajekta (Astravieckaj AES), chutčej za ŭsio, spynić finansavańnie. Sutnaść u tym, što my možam spynić finansavańnie hetaha prajekta, i ja dumaju, što my pavinny stavić pierad saboj mienavita hetuju metu», — ličyć H. Łandśbierhis.
Miž tym, staršynia parłamienckaha Kamiteta pa jeŭrapiejskich spravach, sacyjał-demakrat Hiedyminas Kirkiłas ličyć, što hetyja dziejańni ŭžo źjaŭlajucca zapoźnienymi.
«My ŭžo sapraŭdy padobnymi krokami nie spynim budaŭnictva hetaj elektrastancyi. Užo prajšoŭ hety čas. Zaraz, na maju dumku, my možam tolki źmiakčyć nastupstvy», - skazaŭ BNS parłamientaryj. Jon nie ličyć, što ton Litvy pavinien być «ćviordym i kateharyčnym»: «Isnuje nie tolki Astraviec, jość i adnosiny ź Biełaruśsiu, tranzit praź Litvu, Kłajpiedski port».