Dzieci za baćku: KDB aryštavaŭ nie tolki dom Čyža ŭ Drazdach, ale i majomaść jaho siamji
Kamitet dziaržaŭnaj biaśpieki praciahvaje rasśledavać spravu Juryja Čyža, jaki doŭhi čas ličyŭsia samym paśpiachovym biełaruskim biznesoŭcam.
Jak stała viadoma «Našaj Nivie», u ramkach rasśledavańnia 14 sakavika 2016 hoda Kamitetam dziaržaŭnaj biaśpieki była vyniesiena pastanova ab nakładańni aryštu na majomaść Čyža.
Pavodle jaje, aryštavanaja ŭsia nieruchomaść, jakoj vałodaŭ Juryj Čyž, u tym liku dom u Drazdach, a taksama rezidencyja ŭ katedžnym pasiołku Łahožask pad Łahojskam.
Heta zvyčajnaja praktyka, jakaja prymianiajecca na čas rasśledavańnia. Adnak u situacyi z Čyžom siłaviki dziejničali jašče bolš rašuča. Pavodle toj samaj pastanovy, aryštavanaja nieruchomaść, zarehistravanaja na členaŭ siamji apalnaha miljaniera.
Žonka, Śviatłana Čyž, mieła svoj katedž u «Łahožasku». Jon aryštavany.
U dački Taćciany aryštavany jašče adzin katedž u «Łahožasku», a taksama piacipakajovyja apartamienty ŭ znakamitym domie na Staražoŭskaj, u tak zvanym «domie Čyža».
Narešcie, nakładzieny aryšt i na pałovu katedža ŭ Zacani, jakaja naležyć Siarhieju Čyžu, starejšamu synu biznesoŭca.