«Sierž» pryznaŭ siabie ekanamična niepłaciežazdolnym
Ekanamičny sud Minska pryniaŭ da razhladu zajavu kampanii «Sierž» ab pryznańni jaje ekanamična niepłaciežazdolnaj. Sudom pačata vytvorčaść pa hetaj spravie, ustanoŭleny abarončy pieryjad da 9 červienia.
serge-fashion.by
U vyznačeńni ekanamičnaha suda adznačajecca, što z pradstaŭlenych «Sieržam» spravazdač bałansaŭ uhledžvajecca niepłaciežazdolnaść daŭžnika, jakaja maje ŭstojlivy charaktar. Kredytorami «Sierža» ŭ rašeńni suda nazvanyja BPS-Śbierbank i Pryjorbank.
Časovym kiraŭnikom pa spravie ab bankructvie pryznačanaja kampanija «Jurydyčny aljans». Časovamu ŭpraŭlajučamu daručana pravieści analiz finansavaha stanu i płaciežazdolnaści daŭžnika.
Sudovaje pasiadžeńnie dla vyrašeńnia pytańnia ab adkrycci konkursnaha viadzieńnia pryznačanaje na 9 červienia 2016 hoda.
Zajava ŭ sud była padadziena paśla taho, jak byli vyčarpany ŭsie miery pa praduchileńni ekanamičnaj niepłaciežazdolnaści i dasudovaha azdaraŭleńnia, praduhledžanyja dziejučym zakanadaŭstvam, napisaŭ TUT.BY zasnavalnik kampanii «Sierž» Siarhiej Atroščanka.
U jakaści antykryzisnaj miery, u tym liku ŭ metach zachavańnia pracoŭnaha kalektyvu, «Sierž», u adpaviednaści z normami dziejnaha zakanadaŭstva, pravioŭ rearhanizacyju z vydzialeńniem novaj jurydyčnaj asoby TAA «Sierž-Fešn», jakaja praciahvaje vyrablać i realizoŭvać bializnu pad handlovaj markaj Serge ŭ Biełarusi i na zamiežnych rynkach, piša Atroščanka. U ciapierašni čas dziejničaje kala 200 partniorskich i ŭłasnych kramaŭ i siekcyj.
Vymušanaje skaračeńnie piersanału i niekatorych handlovych kropak, źviazanaje z ahulnym padzieńniem siaredniacenavaha siehmienta fashion-rynka i pierafarmatavańnie rynku arendy, budzie adnoŭlena, spadziajucca ŭ «Sierž». Ad inšych kamientaroŭ u kampanii pakul ustrymalisia.